2010 jyldyń sońyna deıin Astana qalasynda 10 jańa balabaqsha iske qosylady - Bilim basqarmasy
ASTANA. Shildeniń 28-i. QazAqparat /Gúlmıra Álıakparova/ - 2010 jyldyń sońyna deıin Astana qalasynda 10 jańa balabaqsha iske qosylady.
Qalalyq Bilim basqarmasy bastyǵynyń orynbasary Rysty Shoqaevanyń aıtýynsha, mektepke deıingi uıymdardaǵy oryn tapshylyǵy máselesin sheshý úshin 2009-2010 jyl ishinde balabaqshalardyń burynǵy ǵımarattaryn qaıtaryp alý esebinen 2380 orynǵa laıyqtalǵan 12 balabaqsha iske qosyldy.
Odan bólek qazir elordada, 2440 búldirshindi qabyldaýǵa arnalǵan 10 jańa balabaqshanyń qurylystary júrgizilip jatyr. Olardyń beseýin (Kýbrın, Belıakov, №24-37-shi, Aqmeshit kósheleri men Komsomol kentinde) tamyzdyń 1-ine deıin, al qalǵan beseýin (Kóktal-1,2 kentterinde, Seıfýllın men Tilendıev kóshelerinde, Komsomol kentinde) 2010 jyldyń sońynda aıaqtaý josparlanyp otyr.
Eske sala keteıik, Astanada búgingi kúni balabaqsha kezeginde 6 jasqa deıingi barlyǵy 35 myń bala tur. Mektepke deıingi bilimmen qamtylǵandardyń sany - 16 myń. Elbasynyń balabaqshalar sanyn arttyrý jónindegi tapsyrmasyna sáıkes qolǵa alynǵan sharalardyń nátıjesinde barlyq óńirlerde sııaqty Astana qalasynda da mektepke deıingi nysandardyń sany artyp keledi. Máselen, elordada jyl basynda 39 memlekettik balabaqsha jumys istese, qazirgi ýaqytta olardyń sany 48-ge jetti. Sonymen birge 5 jekemenshik mekeme ashyldy, olar - 27.
