2010 jyldyń qorytyndysy Qazaqstannyń álemdik daǵdarystyń saldaryn eńsergenin kórsetip otyr - Máskeýdegi «dóńgelek ústel» otyrysy
MÁSKEÝ. 31 naýryz. QazAqparat /Narymbek Ysmaǵulov/ - Qazaqstan 2010 jyldyń qorytyndysy boıynsha aıtýly jetistikterge qol jetkizip otyr jáne jalpy alǵanda daǵdarysty eńsere aldy.
Máskeýde «Keden odaǵy elderiniń daǵdarystan keıingi damýynyń áleýmettik-ekonomıkalyq qorytyndylary» degen taqyrypta ótken «dóńgelek ústel» otyrysynda Qazaqstannyń ekonomıkalyq damý vıtse-mınıstri Tımýr Súleımenov osylaı málim etti.
Vıtse-mınıstrdiń baǵalaýynsha, 2010 jyly Qazaqstan álemdik daǵdarystan keıingi qalpyna kelýdiń tıimdi nátıjelerin kórsetti.
«7 paıyzǵa ósip, 140 mıllıard AQSh dollarynan asqan jalpy ishki ónimniń ósý dınamıkasy osyǵan dálel. Bul jaqsy kórsetkish», - dep sanaıdy T. Súleımenov.
Vıtse-mınıstrdiń aıtýynsha, «halyqty eńbekpen qamtý sııaqty birqatar áleýmettik-ekonomıkalyq kórsetkishterde de oń úrdister bar. Eger 2009 jyldyń basynda jumyssyzdyq 6,9 paıyzdy qurasa, 2010 jyly bul kórsetkish 5,5 paıyzǵa tómendedi. Oǵan qosa, ótken jyly 90 mıllıard AQSh dollaryn quraǵan taýar aınalymy da kóńilge jaqsy úmit uıalatyp otyr».
«Damý kórsetkishterin jınaqtaı kele, Qazaqstan 2010 jyly jaqsy nátıjelerge qol jetkizdi jáne jalpy alǵanda daǵdarystan shyǵa aldy deı alamyz», - dep túıindedi óz sózin vıtse-mınıstr.
