2010 jyldyń qańtarynda Qazaqstanda jumyssyzdar sany 542 myń 900 adamdy qurady - Statıstıka
ASTANA. Aqpannyń 12-si. QazAqparat - 2010 jyldyń ótken qańtar aıynda respýblıkada jumyssyzdar sany 542 myń 900 adamdy qurady,
dep habarlaıdy QazAqparat QR Statıstıka agenttigine silteme jasap.
Vedomstvo usynǵan málimetterge súıensek, ústimizdegi jyldyń qańtar aıynda el ekonomıkasynda 7,9 mıllıon adam (baǵalaý boıynsha) jumys istedi. Ótken jyldyń sáıkes kezeńimen salystyrǵanda olardyń sany 100,4 myń adamǵa kóbeıdi. Atalmysh kezeńde jalǵa alynǵan jumyskerlerdiń sany 5,3 mıllıondy nemese jumyspen qamtylǵandardyń jalpy sanynyń 66,6 paıyzyn qurady.
Al qańtar aıynda jumyssyz júrgenderdiń sany 542,9 myń adamdy qurap, el boıynsha jumyssyzdyq deńgeıi 6,4 paıyz boldy. Qańtar aıynyń sońyndaǵy jaǵdaı boıynsha, QR Eńbek jáne halyqty áleýmettik qorǵaý mınıstrliginiń jumyspen qamtý organdarynda resmı tirkelgenderdiń sany 63,4 myń adamdy ǵana qurady. Resmı tirkelgenderdiń arasynda ekonomıkalyq belsendilerdiń úlesi 0,7 paıyz boldy (2009 jyldyń qańtarynda - 0,7 paıyz).
Sondaı-aq baǵalaý boıynsha, 2010 jyldyń qańtarynda jasyryn jumyssyzdyq deńgeıi ekonomıkalyq belsendi halyqtyń 0,7 paıyzyn qurady. Aıta keteıik, jasyryn jumyssyzdyq bul - jumysshylardyń tolyq emes kún tártibine aýystyrylýy ne bolmasa, olardyń eńbekaqysy saqtalmaı, ne jartylaı tólenip ákimshilik demalystarǵa jiberilýi. Al jumyssyzdarǵa - tabys beretin jumystary bolmaǵan, biraq ony belsendi izdegen jáne oǵan kez kelgen ýaqytta kirisýge ázir turǵan tulǵalar jatady.
