2010 jyldyń eń reıtıngti oqıǵasy - Qazaqstannyń EQYU-ǵa tóraǵalyǵy - SShI zertteýi
ALMATY. 21 jeltoqsan. QazAqparat /Erbol Azanbek/ - Ótip bara jatqan jyldyń eń reıtıngti oqıǵasy - Qazaqstannyń EQYU-ǵa tóraǵalyǵy.
Bul týraly búgin Almatyda «Qazaqstannyń iri qalalaryndaǵy áleýmettik kóńilkúı» taqyrybyndaǵy zertteý qorytyndysyna arnalǵan arnaıy baspasóz máslıhatynda Saıası sheshimder ınstıtýynyń (SShI) bólim jetekshisi Irına Chernyh aıtty.
Onyń sózine qaraǵanda, SShI men QR Áleýmettanýshylar jáne saıasattanýshylar qaýymdastyǵynyń dástúrli zertteýine elimizdiń 16 qalasy men oblys ortalyqtary qamtylǵan. Barlyǵy 2308 adam qatysqan zertteýde respondentterdiń 38,7 paıyzy jyldyń tabysty bolǵandyǵyn, 38,2 paıyzy qarapaıym bolǵandyǵyn aıtqan. Saýalnamaǵa qatysqandardyń 24 paıyzy elimizdegi eń reıtıngti oqıǵa retinde Qazaqstannnyń EYQU-ǵa tóraǵalyǵyn ataǵan.
«Zertteý kórsetkendeı, qala turǵyndaryn tek materıaldyq jaǵdaı ǵana emes, ımıdjdik oqıǵalar da tolǵandyrady eken. Turǵyndardyń 42,3 paıyzy EQYU sammıtiniń Qazaqstan ımıdjin halyqaralyq deńgeıde kóteretin oqıǵa ekendigin aıtty»,- deıdi I.Chernyh.
Astanadaǵy sammıtti árbir ekinshi qazaqstandyq qoldasa, saýalnamaǵa qatysqandardyń 52,7 paıyzy sharanyń tabysty, tıimdi bolǵandyǵyn atap ótken. «Bul rette BAQ ókilderine úlken alǵys aıtý qajet. BAQ tarapynan úlken qoldaýdyń nátıjesinde qazaqstandyqtardyń basym bóligi EQYU tóraǵalyǵy týraly jaqsy biledi. Saýalnamaǵa qatysqandardyń tek 2,8 paıyzy ǵana Qazaqstannyń EQYU-ǵa tóraǵalyǵy týraly bilmeıtindikterin aıtqan. 2009 jyldyń sońynda bul kórsetkish 40 paıyz edi»,- dedi SShI sarapshysy.
Onyń aıtýynsha, turǵyndar EQYU tóraǵalyǵymen qatar bıylǵy jyldyń eń reıtıngti oqıǵalary retinde Elbasynyń Qazaqstan halqyna Joldaýyn (21,5 paıyz), 2011 jylǵy qysqy Azııa oıyndaryna daıyndyqty (21,1 paıyz) kórsetken.
