2010 jyldan bastap zańsyz aınalymnan 10 myń tonnaǵa jýyq munaı alyndy

Bul týraly búgin QR Ekonomıkalyq qylmysqa jáne sybaılas jemqorlyqqa qarsy kúres agenttiginde ótken brıfıng barysynda resmı ókili Murat Jumanbaı málim etti.

«2010 jyldan bastap qarjy polıtsııasy organdary munaı men munaı ónimderiniń zańsyz aınalymy salasynda 203 qylmystyq is qozǵaǵan. Zańsyz aınalymnan 10 myńǵa jýyq tonna munaı jáne munaı ónimderi, zańsyz tabys bolyp tabylatyn 313 mln.teńge alyndy. Munaı men munaı ónimderin «kóleńkeli» naryqqa ákelýdiń kózi qubyrlardan munaı urlaý bolyp tabylady»,-  dedi ol.

Máselen, resmı ókildiń aıtýynsha, Qaraǵandy oblysynda «KazTransOıl» AQ-nyń Jezqazǵan magıstraldy munaı qubyrlarynyń «Qumkól-Qarokoın» qubyrynan 5,4 mln. teńgeniń munaıyn urlaǵany úshin múlkin tárkileýmen 8 jylǵa bas bostandyǵynan aıyrýǵa N.Dáýletov, onyń sybaılastary Bekmuratov, Abdramanov, Kýpeısov jáne Ermanov - árqaısysy shartty túrde 3 jylǵa bas bostandyǵynan aıyrýǵa sottaldy.

Sondaı-aq Mańǵystaý oblysynda múlkin tárkileýmen 10 jylǵy bas bostandyǵynan aıyrýǵa «SMP OIL» JShS-niń dırektory Sársembıev sottaldy. Ol 2009 jylǵy shilde-qarasha aılary aralyǵynda «Ózen-Atyraý-Samara» qubyrynan munaı urlap, ony satýmen aınalysqan. Oǵan qosa, deklaratsııalarǵa jalǵan málimetterdi engizý arqyly 12,5 mln. teńge somasynda salyq tóleýden jaltarǵan.

«Ońtústik Qazaqstan oblysynda Posohov, Kapyttsov, Kım jáne Ubaıdýllaevtan turatyn  qylmystyq top qyzmeti áshkerelendi. Olar 4,9 mln. teńge somasynyń 57 tonna kólemindegi shıki munaıy bar 2 aýyr júk kóligin júrgizip kele jatqanda ustalǵan. Bul munaı Ordabasy aýdanynyń Qaınar aýylynyń janynda ornalasqan «Pavlodar-Shymkent» qubyrynan urlanǵan»,- dedi M.Jumanbaı.