2010 jyldan bastap elimizde KSRO kezinde batyr, eńbek eri, eńbegi sińgen sportshy ataǵyn alǵandarǵa járdemaqy mólsheri aıtarlyqtaı artady
ASTANA. Qarashanyń 12-si. QazAqparat /Qanat Mámetqazyuly/ ‑ 2010 jyldan bastap elimizde KSRO kezeńinde batyr, eńbek eri, eńbegi sińgen sportshy ataǵyn alǵandarǵa, sondaı‑aq ǵarysh salasyna qatysty ataq alǵandarǵa memlekettik járdemaqy mólsheri aıtarlyqtaı arta túsedi.
QR Parlamenti qabyldaǵan «QR keıbir zańnamalyq aktilerine azamattardyń jekelegen sanattaryn áleýmettik qoldaý máseleleri boıynsha ózgerister men tolyqtyrýlar engizý týraly» zańda osy máseleler qamtylǵan, dep habarlaıdy QazAqparat.
Zańǵa sáıkes 2010 jyldan bastap elimizdegi Ulty Otan soǵysynyń batyrlary men úsh dárejeli «Dańq» ordeniniń ıegerlerine beriletin arnaýly járdemaqy mólsheri 183 myń 690 teńgege deıin artady.
Eńbek jáne halyqty áleýmettik qorǵaý mınıstri Gúlshara Ábdihalyqovanyń aıtýynsha, zań jobasymen áskerı qyzmetshiler qataryndaǵy zeınetkerlerdiń eńbek sińirgen jyldary úshin beriletin zeınetaqy tólemderiniń eń joǵary mólsherin burynǵy 75 AEK-ten 86 AEK-ke deıin arttyrý kózdelgen. ıAǵnı, buryn atalǵan sanattaǵy azamattar 97 myń 200 teńge járdemaqy alyp kelse, 2010 jyldan bastap 121 myń 518 teńge alatyn bolady.
Sonymen birge, 1941-1945 jyldardaǵy Ulty Otan soǵysynyń 65 jyldyǵyn merekeleý qarsańynda, soǵys qımyldary júrgizilgen memleketterde áskerı boryshyn ótegenin, elimizdiń egemendigi men memlekettiligin nyǵaıtýǵa qosqan úlesin eskerip, birqatar zań aktilerine de ózgerister engiziledi. Uly Otan soǵysynyń qatysýshylary bolyp tabylatyn adamdarǵa, Sotsıalıstik Eńbek erlerine - 21 myń 195 teńgeden 98 myń 910 teńgege deıin arta túsedi. Budan basqa, «Qazaqstannyń ǵaryshker ushqyshy» qurmetti ataǵyna ıe bolǵan adamdarǵa 130 aılyq eseptik kórsetkish mólsherinde, ıaǵnı 183 myń 690 teńge shamasynda memlekettik járdemaqy taǵaıyndalady.
Sondaı-aq olımpıadalyq sport túrleri boıynsha Qazaqstannyń nemese burynǵy KSRO-nyń qurama komandalarynyń quramyna kirgen, 20 jyl eńbek ótili bar, eńbegi sińgen sportshylar men bapkerlerdi memlekettik qoldaý maqsatynda, olarǵa beriletin aı saıynǵy materıaldyq qamsyzdandyrý mólsheri 11 myń 34 teńgeden 33 myń 912 teńgege deıin ósedi.
Zań Elbasynyń qol qoıýyna jiberildi.
