2010 jyldan bastap álemde munaıdy tutynýdyń 2014 jylǵa deıin jyl saıyn 1,5-3 paıyzǵa ósetini kútilýde
ASTANA. Qarashanyń 7-si. QazAqparat /Aıdyn Báımen/ - Halyqaralyq uıymdardyń boljamdary boıynsha, osy kezge deıingi álemdik ekonomıkanyń quldyraýynan keıin 2010 jyldan bastap ekonomıkalyq belsendiliktiń birtindep kóterilýi kútilýde.
Sonymen qatar álemdik ekonomıkanyń quldyraýyn Halyqaralyq valıýta qory edáýir tereń dep baǵalap otyrǵandyqtan, kóterilý, tıisinshe, baıaý bolady. Úkimettiń Qazaqstan Respýblıkasynyń 2010-2014 jyldarǵa arnalǵan áleýmettik-ekonomıkalyq damý boljamynda eldiń syrtqy damý jaǵdaıyna qatysty osyndaı túsindirme berilgen, dep habarlaıdy QazAqparat.
Álem elderindegi qarjy júıesine senimdilikti qalpyna keltirýmen qosa daǵdarysqa qarsy belsendi sharalar ósýdi jyldamdatýǵa yqpal ete alady.
Orta merzimdi kezeńde álemdik qarjy daǵdarysynan bolǵan jahandyq qarjy naryqtaryn túzetý, álemdik kapıtaldy qaýipterdi tómendetý maqsatynda qaıta taratý júrgizilýi yqtımal kórinedi.
Orta merzimdi kezeńde álemdik ekonomıkanyń jandanýy men onyń ósý qarqyndarynyń joǵarylýy suranystyń ósýine jáne resýrstarǵa baǵalardyń ósýine yqpal etetin bolady.
Álemdik ekonomıkanyń damý perspektıvalaryn eskere otyryp, orta merzimdi kezeńde álemdik taýar naryqtarynda baǵalardyń kúrt ósýi kútilmeıdi.
Halyqaralyq uıymdar munaıǵa, metaldarǵa álemdik baǵalardyń birtindep kóterilýin boljap otyr. 2010 jyldan bastap álemde munaıdy tutynýdyń 2014 jylǵa deıin jyl saıyn 1,5-3 paıyzǵa ósetini kútilýde. Halyqaralyq uıymdardyń boljamy boıynsha, 2010 jyly munaıǵa álemdik baǵa bir barreline 60-70 AQSh dollary sheginde bolady.
Al ABARE-niń (Avstralııa Úkimeti janyndaǵy aýyl sharýashylǵy, jer qoınaýyn paıdalaný jáne energetıka salasyndaǵy ekonomıkalyq zertteýler bıýrosy) boljamy boıynsha, 2010 jyldan bastap metaldardy álemdik tutyný kólemi orta eseppen 2014 jylǵa deıin jylyna 4-6 paıyzǵa ósýi kútilýde. Bul metaldarǵa baǵalardyń kóterilýine múmkindik týdyrady.
Álemdik taýar jáne qarjy naryqtaryndaǵy jaǵdaılar turaqtalady jáne syrtqy qaryz alý sharttary jaqsarady dep boljanýda. Orta merzimdi kezeńde metaldarǵa álemdik baǵa jyl saıyn ortasha 5-8 paıyzǵa artady.
