2010-2014 jyldary energetıka salasynda 6,5 myń jumys orny ashylady

ALMATY. 2 qarasha. QazAqparat /Erlik Erjanuly/ - Údemeli ındýstrııalyq-ınnovatsııalyq damý jónindegi memleketik baǵdarlama boıynsha 2010-2014 jyldary energetıka salasynda 24 myńdaı maman daıyndalady. Bul búgin Almatyda ótip jatqan Energetıkter forýmynda aıtyldy.

"Údemeli ındýstrııalyq-ınnovatsııalyq damý jónindegi memleketik baǵdarlama boıynsha 2010-2014 jyldary energetıka salasynda 6,5 myń jumys orny ashylady. Sondaı-aq joǵary jáne orta bilim mekemelerinde 11 mamandyqta 24 biliktilik boıynsha 2,4 myń mamandy qaıta daıyndyqtan ótkizý jáne oqytý kózdelip otyr. Bul jańa jobalardy júzege asyrýǵa qajetti mamandardyń sany. Bilim jáne ǵylym mınıstrliginiń óz josparlary boıynsha daıyndaıtyn stýdentteri budan bólek",- deıdi QR Indýstrııa jáne jańa tehnologııalar vıtse-mınıstri Dúısenbaı Turǵanov.

Onyń aıtýynsha, ındýstrııalandyrý baǵdarlamasy boıynsha naqty jobalardy júzege asyrýdaǵy kelisim-sharttarda da mamandar daıyndaý máselesi enip otyr. Onda syrttan qural-jabdyqtar ǵana tasyp qoımaı, qaı kezde oǵan qansha maman ázirleý kerektigi naqty kórsetilgen. Jalpy qazir elektr energetıkasy salasynda jumys jasaıtyn mamandardyń sany 75 myńnan asty. Búgingi tańda Bilim jáne ǵylym mınıstrligi men Eńbek jáne halyqty áleýmettik qorǵaý mınıstrligi birlesip elektrenergetıkasy salasyndaǵy mamandardyń biliktiligin kóterý men kásibı standarttaryn jasaýdy josparlap otyr.