2010-2013 jyldar aralyǵynda 800-ge tarta balabaqsha iske qosylmaq
ASTANA. Naýryzdyń 19-y. QazAqparat /Qanat Mámetqazyuly/ - 2010-2013 jyldar aralyǵynda 800-ge tarta balabaqsha iske qosylmaq. Bul týraly búgin QR Parlamenti Májilisinde ótip jatqan «Memlekettik til - el birliginiń kepili» atty ǵylymı konferentsııa barysynda «Bir tilde sóıleý - birlik bastaýy» taqyrybynda baıandama jasaǵan Májilis tóraǵasy Oral Muhamedjanov málim etti,
dep habarlaıdy QazAqparat.
«90-shy jyldardaǵy ekonomıkalyq qıyndyqtar kezeńinde mektepke deıingi balalar mekemeleriniń sany kúrt kemip ketti. Alaıda, 1999 jyldan bastap memleket bul isti qaıta qolǵa aldy. Nátıjesinde 2009 jylǵa deıin tek qazaq tilinde tárbıe beretin 648 balabaqsha ashylypty. Qazir memlekettik tilde bilim beretin mektepke deıingi balalar mekemeleri úshin qaıta órleý kezeńi keldi. Bul iske serpin bergen Elbasynyń Joldaýy», dedi O. Muhamedjanov.
Sonymen birge palata tóraǵasy Joldaýda Úkimetke «Balapan» baǵdarlamasyn ázirleý tapsyrylǵanyn atap ótti. Bul baǵdarlama aıasynda 2010-2013 jyldar aralyǵynda 800-ge tarta balabaqsha iske qosylatynyn jetkizdi. «Mektepter máselesine kelsek, táýelsizdik alǵan jyldardan bastap ana tilimizde oqytatyn mektepter sany júıeli túrde ósip otyrǵanyn kóremiz. 1991 jyldan beri 900-den asa mektep qatarǵa qosyldy. Al qazirgi kúni memlekettik tilde oqıtyn balalar sany 63 paıyzdy quraıdy. Táýelsizdikke deıin bul kórsetkish bar-joǵy 22 paıyz ǵana edi. Jalpy, qazaq balalarynyń 84 paıyzy, ózge ult ókilderinen 28 myńnan astam bala qazaq tilinde oqıdy eken», dedi O. Muhamedjanov.
