2010-2011 jyldary elimizde 2 balalar aýyldaryn jáne 3 jasóspirimder úılerin ashý josparlanýda

Búgin QR Parlamenti Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine otbasy úlgisindegi balalar aýyldary jáne jasóspirimder úıleri máseleleri boıynsha ózgerister men tolyqtyrýlar týraly» QR zań jobasyn talqylaý barysynda QR Bilim jáne ǵylym vıtse-mınıstri Mahmetǵalı Sarybekov osylaı málim etti.

Vıtse-mınıstrdiń aıtýynsha, zań jobasynda jetim balalarǵa arnalǵan mektep-ınternattardyń janynan jasóspirimder úılerin qurýdy kózdeıtin normalar qamtylady. Qoldanystaǵy zańda bul kórsetilmegen bolatyn. Usynyp otyrǵan ózgerister men tolyqtyrýlar jasóspirimder úıleriniń zańdyq mártebesin zańnamaǵa sáıkestendirýge jáne onyń qyzmetin retteýge múmkindik beredi.

«Budan basqa, jyl saıyn jalpy bilim beretin mektepterdiń 9-11 synyptaryn jetim jáne ata-ananyń qamqorlyǵynsyz qalǵan bilim berý uıymdarynyń 2000-ǵa jýyq bitirýshisi tamamdaıdy. Olardyń basym bóligi kásiptik-tehnıkalyq bilim berý mekemelerinde ornalasyp, sonda jataqhanada turyp jatady. Orta eseppen jyl saıyn 100-ge tarta bala eńbekpen qamtylýdy qajet etedi», dedi M. Sarybekov. Onyń aıtýynsha, búgingi kúni elimizdegi jasóspirimder úıiniń jobalyq qýaty 1 myń 400 oryndy quraıdy. «Zań jobasynda jasóspirimder úıleri mekemeleriniń jelisin keńeıte túsý qareketteri qarastyrylady. Máselen, qazirgi ýaqytta 2010-2011 jyldarǵa arnalǵan «Qazaqstan balalary» baǵdarlamasy sheńberinde Almaty jáne Aqtóbe oblystarynan 2 balalar aýyldaryn, Shyǵys Qazaqstan, Mańǵystaý oblystary men Astana qalasynda 3 jasóspirimder úılerin ashý josparlanýda», dedi vıtse-mınıstr.