2009 jyly «Jazýshy» baspasy 743 baspa tabaq kitap shyǵardy

dep habarlaıdy QazAqparat.

Atalmysh baspa «Álemdik fılosofııalyq mura» aıdarymen jıyrmasynshy tomdy oqyrmanǵa usynǵan. «Qazirgi túrki fılosofııasy» atalatyn tomda tuńǵysh ret qazirgi túrki halyqtary kórnekti oıshyldarynyń irgeli eńbekteri engen. Sonymen qatar qazaq fılosofııasynyń máseleleri de osy tomda berilip otyr.

«Jazýshy» baspasy qazaq ertegilerin kitap jáne bir kompakt dıski túrinde shyǵardy. Halyq aýyz ádebıetiniń erekshe bir qyzyq ta qunarly túri - ertegiler. Atalǵan dıskide «Kerqula atty Kendebaı», «Kún astyndaǵy Kúnekeı qyz» sekildi nebir tamasha qııal-ǵajaıyp ertegiler qamtylǵan. Halqymyzdyń erte dáýirdegi turmys-tirshiliginen jáne oı-armanynan týǵan bul ertegilerdiń tili jeńil, balalar úshin tárbıelik máni zor.

«Elektrondyq  kitaphana. Balalar ádebıeti» serııasynyń kelesi bir tomyna Qobylandy, Alpamys, Er Tarǵyn, Qambar batyr jaıyndaǵy qaharmandyq dastandar endi.

Atalmysh serııamen «Bilgenniń paıdasy» degen kitap ta shyqty. Onda Ybyraı Altynsarınnen bastap, Bolat Úsenbaev pen Marat Qabanbaıǵa deıingi qazaq aqyn-jazýshylarynyń balalarǵa arnalǵan óleńderi men ertegileri, áńgimeleri toptastyrylǵan.

Al «Qazaqstan halyqtary ádebıeti» serııasy boıynsha aqyn Sagın-Gıreı Baımenovtiń jyr jınaǵy jaryq kórgen. Sol sekildi uıǵyr halqynyń belgili aqyny Jamshıt Rozahýnovtyń «Aqqýlar qaıtqanda» kitabynda keıingi jyldary jazylǵan óleńderi men balladalary toptastyrylǵan. Osy aıdarmen jazýshy Vladımır Gýndarevtiń   bir tomdyǵy jáne Jaıyq óńiriniń aqyny Tatıana Azovskaıanyń  jyr kitaby jarııalandy. Sonymen qatar Muhtar Áýezovtyń «Kókserek» povesi uıǵyr tilinde, al úlken tárbıelik oıǵa, fılosofııalyq talǵamǵa qurylǵan qazaq halqynyń maqal-mátelderi ózbek tilinde aýdarylyp, jeke kitap bolyp oqyrmanǵa usynylǵan.

«Memlekettik tapsyrys jáne «Mádenı mura» baǵdarlamasy boıynsha 20 tomdyq «Álemdik fılosofııalyq mura», 10 tomdyq «Álemdik mádenıettaný oı-sanasy» kitaptaryn shyǵarý isine 2004 jyly kirisken baspa ujymy atalǵan baǵdarlamany 2009 jyly abyroımen oryndady»,- deıdi «Jazýshy» baspasynyń dırektory Esenǵalı Raýshanov.

Bıyl 418 baspa tabaq kóleminde 18 tomy jaryq kórgen «Qazaqtyń 100 romany» serııasy jáne tanymdyq mańyzy zor «Elektrondy kitaphana. Balalar ádebıeti», «Tabıǵat» serııalary aldaǵy jyly da jalǵasady. Sondaı-aq, buǵan deıin onnan astam kitaby jaryq kórip toqtap qalǵan áskerı- patrıottyq «Sardar» serııasy da Uly Jeńistiń 65 jyldyǵyna oraı 2010 jyly óz jalǵasyn tabady.