2009 jyly prokýrorlar jemqorlyqpen kúres zańdarynyń oryndalýyna 2,5 myń tekserý júrgizip, 1 myń 300-ge jýyq zańsyz aktilerdiń kúshin joıdy
ASTANA. Aqpannyń 4-i. QazAqparat /Aıdar Ospanalıev/ - 2009 jyly prokýrorlar jemqorlyqpen kúres zańdarynyń oryndalý barysyna 2,5 myń tekserý júrgizgen.
Olardyń nátıjesi boıynsha 1 myń 300-ge jýyq zańsyz aktilerdiń kúshi joıylyp, keıbireýlerine ózgeris engizilgen. Al jemqorlyqqa jol bergenderi úshin myńnan astam túrli dárejedegi sheneýnik jýapkershilikke tartylyp, 12 qylmystyq is qozǵalǵan. Bul týraly búgin jýrnalıstermen bolǵan brıfıngte Bas prokýratýranyń resmı ókili Nurdáýlet Súıindikov málim etti, dep habarlaıdy QazAqparat.
Onyń derekterine qaraǵanda, atalǵan zań buzý áreketteri boıynsha memleket qorjynyna 120 mıllıon teńge qaıtarylǵan. «Tekserýler barysynda birqatar laýazym ıeleriniń qyzmet babyn paıdalanyp, ózderiniń jáne ózge de azamattardyń múddesin paıdalaný áreketteri oryn aldy. Aıtalyq, Kókshetaý qalasy ákimi apparatynyń bas mamany Beıseýov óziniń qyzmetin paıdalana otyryp, óte az ýaqyt ishinde sheshesine jer alyp berý máselesin sheshken. Al Aqmola oblysynyń Sandyqtaý aýdanynyń sanıtarlyq-epıdemıologııalyq qadaǵalaý bóliminiń jetekshi mamany Sýzlıtsev óz qyzmeti boıynsha júrgizilýi tıis dezınfektsııalaý jumystaryn óziniń jeke kásipker áıeliniń atynan júrgizgen. Atalǵan azamattardyń barlyǵy ákimshilik jaýapqa tartyldy», dedi resmı ókil.
Onyń málimeterine qaraǵanda, qyzmet babyn jeke múddesine paıdalaný áreketteri Shyǵys Qazaqstan, Batys Qazaqstan, Jambyl, Qostanaı, Pavlodar, Mańǵystaý, Soltústik Qazaqstan jáne Ońtústik Qazaqstan oblystarynda oryn alǵan.
