2009 jyly elimizdiń birqatar oblystarynda zańsyz alkogoldik ónimder shyǵaryp kelgen 6 zaýyttyń qyzmeti toqtatyldy

Bul týraly búgin jýrnalıstermen bolǵan aptalyq brıfıngte Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı aıtty.

Onyń aıtýyna qaraǵanda, ótken jyly zańsyz aınalymnan 481 mln teńgeniń alkogoldik ónimderi tárkilenip, 1,5 mln teńgeden astam jalǵan esepke alý-baqylaý markalary alynǵan. Qoldan jasalǵan spırttik ishimdikterdi daıyndaıtyn astyrtyn tsehtardyń qyzmeti halyqtyń densaýlyǵy úshin asa qaýipti bolyp tabylatyndyǵyn atap ótken resmı ókildiń aıtýynsha, Almaty qalasynda «REALMA» saýda markasynyń araǵyn qoldan jasaıtyn astyrtyn tseh anyqtalǵan. Onyń jalǵa alynǵan qoımalarynan 72 myń dana jalǵan esepke alý-baqylaý markasy tabylǵan. Al tárkilengen araq-sharap ónimderiniń baǵasy 31,5 mln teńgeni quraǵan. «Bul fakt boıynsha «Kalıta<d» JShS dırektorynyń orynbasary Sırotkın shartty túrde 2 jylǵa bas bostandyǵynan aıyryldy», dedi ol.

Osyǵan uqsas qylmystyq isi úshin Astana qalasynda Ázimbaev degen azamat shartty túrde 4 jylǵa bas bostandyǵynan aıyrý jazasyna kesilgen. Ol jalpy somasy 13,5 mln teńgeniń jalǵan esepke alý-baqylaý markalary japsyrylǵan alkogol ónimderin zańsyz saqtaǵan jáne saýdaǵa shyǵarǵan. Sonymen qatar atalǵan azamat spırttik ishimdikterdi óndirýshiniń biriniń taýar belgisin qoldanyp, 3,5 mln teńge zalal keltirgen. «Alynǵan kontrafaktilik alkogoldik ónimder joıyldy», dedi resmı ókil.