2009 jyly aýylsharýashylyǵynyń jalpy óndirisiniń kólemi 13,8 paıyzǵa ósti, bul sońǵy 8 jyldaǵy eń joǵary kórsetkish - mınıstr A. Kúrishbaev
ASTANA. Qańtardyń 18-i. QazAqparat /Ernur Aqanbaı/ - 2009 jyly elimizdiń aýylsharýashylyǵynyń jalpy óndirisiniń kólemi 13,8 paıyzǵa ósti, bul sońǵy 8 jyldaǵy eń joǵary kórsetkish bolyp tabylady.
Bul týraly búgin Astanada Aýyl sharýashylyǵy mınıstrliginiń keńeıtilgen alqa májilisinde mınıstr Aqylbek Kúrishbaev aıtty, dep habarlaıdy QazAqparat.
Onyń sózine qaraǵanda, qaıta óńdeý salasyn aıtpaǵanda, byltyr agroónerkásip keshininiń barlyq salasy álemdik qarjy daǵdarysynyń teris yqpaldaryna qaramastan sońǵy jyldary qol jetkizgen ósim qarqynyn saqtap qalǵan. Sóıtip ishki azyq-túlik naryǵynyń turaqtylyǵyn qamtamasyz etýge jáne salanyń eksporttyq áleýetin odan ári qarqyndatýǵa jaqsy negiz qalandy. «Eksporttyq shıkizattyq baǵyttyń tómendeý úderisi júrýde. Buny astyq eksportynyń mysalynan kórýge bolady. Jyl saıyn óńdelgen ónimderdiń, ıaǵnı unnyń úlesi ulǵaıyp keledi. Máselen, 2003 jyly astyq eksportynyń jalpy kólemindegi onyń úlesi 10,6 paıyzdy qurasa, ótken jyly biz astyq ónimderiniń jartysyna jýyǵyn un túrinde eksporttadyq. Sóıtip ol 2,2 mln. tonna kóleminde rekordtyq kórsetkishke jetti. Osylaısha undy eksporttaý boıynsha álemdik kóshbasshy retindegi ózimizdiń myqty pozıtsııamyzdy taǵy da qýattadyq», dedi mınıstr.
