2009 jyly Astanada oryn alǵan óndiristik jaraqattardyń 80 paıyzy qurylys nysandarynda boldy - E.Rahymbergenov
ASTANA. Sáýirdiń 29-y. QazAqparat /Gúlmıra Álıakparova/ - Ótken jyly Astana kásiporyndarynda oryn alǵan jazataıym oqıǵalardyń 80 paıyzy qurylys nysandarynda boldy.
Bul týraly búgin Kongress-Holl saraıynda ótken eńbek zańnamasy boıynsha jalpyqalalyq semınar-keńeste QR Eńbek jáne halyqty áleýmettik qorǵaý mınıstrliginiń Astana qalasy boıynsha departament dırektory Erkin Rahymbergenov málim etti.
«2009 jyly óndiriste 138 jazataıym oqıǵa oryn alsa, onyń 38-i qaıǵyly aıaqtaldy. Ózderińizge belgili ótken jyldyń kúzinde bolǵan órt birden 14 adamnyń ómirin alyp ketti. Jalpy oqıǵalardyń 80 paıyzy qalanyń qurylys nysandarynda oryn alǵan. Olardyń arasynda bıiktikten qulaý jaǵdaılar jıi kezdesedi», - dep atap ótti ol.
E.Rahymbergenovtyń aıtýynsha, qurylys nysandarynda jumys berýshi jumysshylarǵa barlyq qaýipsizdik jaǵdaılaryn jasaı otyryp, kóp jaǵdaıda olardyń oryndalýyn qadaǵalamaıdy. «Tekseris barysynda, eńbekker qaýipsizdik beldemshelerin taqpaı, kaskalaryn kımeı jumys istep jatqany anyqtaldy. Bul árıne, birinshi kezekte jumysshynyń ereje buzýshylyǵy bolyp tabylady. Biraq biz qashanda jeke bastyń qaýipsizdigin qamtamasyz etý erejelerin jumys berýshi qadaǵalaý kerek degendi aıtamyz», - dedi.
Aıta keteıik, ústimizdegi jyldyń tórt aıynda elorda qurylystarynda 45 jazataıym oqıǵa tirkeldi. Onyń úsheýi ólimmen aıaqtaldy.
