2009 jylǵy Ulttyq sanaq qorytyndysy boıynsha Qazaqstan halqy 16 mln. 9 myń adamdy qurady - Statıstıka
ASTANA. 13 qańtar. QazAqparat /Marlan Jıembaı/ - 2009 jylǵy Ulttyq sanaq qorytyndysy boıynsha Qazaqstan halqy 16 mln. 9 myń adamdy qurady.
Bul týraly búgin elordada ótken baspasóz máslıhatynda QR Statıstıka agenttiginiń tóraǵasy Álıhan Smaıylov málim etti.
«Jalpy halyq sany 16 mln. 9 myń adamdy qurady. 1999 jyl ótkizilgen sanaq derekterimen salystyrǵanda respýblıka turǵyndary 1 mln. 28 myń adamǵa kóbeıip, 7 paıyz ósim kórsetti», - dedi agenttik basshysy.
Sanaqtyń sońǵy derekterine sáıkes, elimizde turyp jatqan halyqtardyń 1 paıyzdan asatyndarynyń ishinde qazaqtar sany - 26, ózbekter - 23, uıǵyrlar 6,8 paıyzǵa ósken. Al orystardyń sany - 15,3, ýkraındar - 39,1, tatarlar - 18, nemister 49,5 paıyzǵa kemigen.
Sonymen qatar Á.Smaıylovtyń aıtýyna qaraǵanda, 1999 jyldan bergi aralyqta halyqtyń jas aralyǵynda birshama ózgerister oryn alyp, 15-35 jastaǵy adamdar sany artqan. «Sebebi halyq quramynda 85-93 jyldary aralyǵyndaǵy dúnıege kelgen adamdardyń sany kóp. Ol soǵystan keıin oryn alǵan "bebı-býmnyń" ekinshi yqpaly», - dedi ol.
