2009 jyldyń qazan aıynda elimizdegi ınflıatsııa deńgeıi 0,4 paıyzdy qurady - Statıstıka agenttigi
ASTANA. Qarashanyń 5-i. QazAqparat /Qanat Mámetqazyuly/ - 2009 jyldyń qazan aıynda elimizdegi ınflıatsııa deńgeıi 0,4 paıyzdy qurady.
Bul týraly QazAqparat QR Statıstıka agenttiginiń baspasóz qyzmetine silteme jasap habarlaıdy.
Baspasóz qyzmetiniń taratqan málimetteri boıynsha, elimizde baǵa aqyly qyzmet kórsetýlerge ótken aıda 0,9 paıyzǵa, azyq-túlik emes taýarlarǵa - 0,4 paıyzǵa ósken. Bul rette baǵa ındeksi azyq-túlik taýarlaryna 100 paıyzdy quraǵan.
Sonymen birge, respýblıka boıynsha qatty otynnyń baǵasy 1,7 paıyzǵa, medıtsınalyq dári-dármekter - 0,8 paıyzǵa, kıim men aıaq kıimge, ydysqa - 0,6 paıyzǵa, kitaptar men gazetterge - 0,4 paıyzǵa artqan. Budan basqa qazan aıynda benzın 0,7 paıyzǵa, dızel otyny - 0,3 paıyzǵa qymbattasa, kerisinshe qurylys materıaldary 1,5 paıyzǵa arzandapty.
Sondaı-aq, baǵa deńgeıi bilim berý, densaýlyq saqtaý qyzmetterine - 0,9 paıyz, meıramhanalar men qonaq úıler qyzmetterine - 0,7 paıyz, mádenıet jáne jeke qyzmetterge - 0,5 paıyzǵa joǵarylaǵan. Al, jolaýshylar kóligi qyzmetteriniń baǵasy - 0,8 paıyzǵa tómendegen.
Turǵyn úı kommýnaldyq qyzmetteri salasynda tarıftiń ósýi kárizge - 3,1 paıyz, ortalyqtanǵan jylýǵa - 3 paıyz, sýyq sýǵa - 2,3 paıyz, ystyq sýǵa - 1,7 paıyz, elektr energııasyna - 0,3 paıyz mólsherinde baıqaldy.
