2009 jyldyń qarashasynda Qazaqstan Respýblıkasynda ınflıatsııa 0,5 paıyzdy, jyl basynan beri 5,6 paıyzdy qurady
ASTANA. Jeltoqsannyń 1-i. QazAqparat - 2009 jyldyń qarashasynda Qazaqstan Respýblıkasynda ınflıatsııa 0,5 paıyzdy qurady, jyl basynan beri - 5,6 paıyz,
dep habarlaıdy QazAqparat QR Statıstıka agenttigine silteme jasap.
Ótken aıda azyq-túlik taýarlaryna baǵa 0,2 paıyzǵa, azyq-túlik emes taýarlarǵa - 0,8 jáne aqyly qyzmet kórsetýlerge 0,5 paıyzǵa ósti.
«Qarasha aıynda azyq-túlik taýarlar rynogynda baǵanyń ósýi jumyrtqaǵa - 2,8 paıyzǵa, qantqa - 2,4, sút ónimderine - 1,5, jemis, balyq jáne teńiz ónimderine - 1, maı jáne mal maıyna - 0,9, kondıterlik ónimderge - 0,8, kofe, shaı jáne kakaoǵa - 0,6 paıyzǵa belgilendi. Al baǵanyń tómendeýi nanǵa 0,6 paıyzǵa, jarma ónimderine - 1,1, jańa jınalǵan kókónisterge - 1,9, kúrishke - 2,2, unǵa - 2,3 jáne kartopqa - 3,6 paıyzǵa tirkeldi», - dep atap ótti agenttiktiń baspasóz qyzmeti.
Sondaı-aq baǵalar qatty otynǵa 1,4, medıtsınalyq dári-dármekterge - 1,1, suıytylǵan gazǵa - 0,9, kıim men aıaq kıimge - 0,7, benzınge - 5,2, dızel otynyna - 6,5 paıyzǵa qymbattady, al qurylys materıaldary kerisinshe 1 paıyzǵa arzandady.
Turǵyn úı-kommýnaldyq qyzmetter salasynda tarıfter ystyq sý men elektr energııasyna - 1,2 paıyzǵa, sýyq sý men qoqys jınaý qyzmeti úshin - 0,4 paıyzǵa artty.
