2009-2012 jyldarǵa arnalǵan Qazaqstannyń adam quqyǵy salasyndaǵy ulttyq áreket josparynyń TMD, Ortalyq Azııa jáne Baltyq elderinde balamasy joq - S.Tursynov

ASTANA. Jeltoqsannyń 2-si. QazAqparat /Marlan Jıembaı/ - Búgin elordadaǵy Qazaq gýmanıtarlyq zań ýnıversıtetiniń stýdentterimen QR Prezıdenti janyndaǵy Adam quqyqtary jónindegi komıssııanyń músheleri kezdesti,

dep habarlaıdy QazAqparat.

Jeltoqsannyń 10-ynda ótetin  Halyqaralyq adam quqyqtary kúnine arnalǵan shara barysynda sóz sóılegen QR Prezıdenti janyndaǵy Adam quqyǵy jónindegi komıssııanyń tóraǵasy, QR Parlamenti Májilisiniń depýtaty Saǵynbek Tursynov adam quqyǵy jalpy adamı qundylyqtardyń kórinisi ekendigin aıta kelip «2009 jyly mamyrdyń 5-inde Memleket basshysy bekitken 2009-2012 jyldarǵa arnalǵan QR-nyń adam quqyǵy salasyndaǵy ulttyq áreket josparynyń TMD, Oralyq Azııa jáne Baltyq elderinde balamasy joq», dedi.

Onyń aıtýynsha, halyqaralyq uıymdar, úkimettik emes quqyq qorǵaý uıymdary, BUU men EQYU da atalǵan ulttyq jobaǵa joǵary baǵa bergen. Qazirgi ýaqytta bul jobanyń elimizdiń aımaqtarynda, sonymen qatar birqatar shet elderde tanystyrylymy ótýde. Máselen, aǵymdaǵy jyly Varshavada tanystyrylyp, Adam quqyǵy jónindegi bıýronyń joǵary baǵasyn alǵan.

Kezdesý barysynda Qazaq gýmanıtarlyq zań ýnıversıtetiniń stýdentteri adam quqyqtaryn qorǵaýdyń halyqaralyq jáne ulttyq tetikterin jetildirý, adam quqyqtaryn sotta jáne sottan tys qorǵaýdy jetildirý máselelerine arnalǵan baıandamalar jasady.