2009-2010 jyldary Qazaqstan 7,8 mıllıon tonna astyq pen un eksporttady
ASTANA. Maýsymnyń 16-sy. QazAqparat /Marlan Jıembaı/ - 2009-2010 jyldary Qazaqstan 7,8 mıllıon tonna astyq pen un eksporttady. Bul týraly búgin aýyl sharýashylyǵy mınıstrliginde kóktemgi egis jumystarynyń aıaqtalýyna oraı ótken baspasóz máslıhaty barysynda vedomstvonyń vıtse-mınıstri Arman Evnıev aıtty.
Aǵymdaǵy marketıng jylyndaǵy jaǵdaı nashar bolmaǵandyǵyn atap ótken ol «biz qazirgi ýaqytta 7,8 mıllıon tonna astyq pen undy eksporttaı aldyq. Alaıda marketıngtik jyl qorytyndysyna áli bir aı ýaqytymyz bar», dedi.
Onyń atap ótýinshe, mamyr aıynda elimiz 1 mıllıonǵa jýyq tonna astyq pen un eksporttaýǵa múmkindik alǵan. «Bul Qazaqstan úshin rekordtyq kórsetkish», deıdi ol.
Aýyl sharýashyǵy mınıstrliginiń keltirgen derekterine sáıkes, aǵymdaǵy jyly kóktemgi egis naýqany ótken jylmen salystyrǵanda 316 myń gektarǵa kem kórsetkishpen aıaqtalǵan. Bıdaı - 14,2 mln., júgeri - 95,4 myń, kúrish - 92,8 myń, qant qyzylshasy - 19,9 myń, maqta - 136 myń, kókónis daqyldary men kartop - 274,8 myń gektarǵa egilgen.
