2009-2010 jyldar aralyǵynda Aýyl sharýashylyǵy mınıstrliginiń qyzmetinde 6 myńnan astam zań buzýshylyq anyqtaldy

Bul týraly búgin QR Parlamenti Senaty depýtattarymen kezdesýi barysynda QR Bas prokýratýrasy Áleýmettik-ekonomıkalyq keńestikte zańdylyqty qadaǵalaý departamenti dırektorynyń orynbasary Aleksandr Ogaı málim etti.

Prokýratýra ókiliniń aıtýynsha, sońǵy ýaqytta aýyl sharýashylyǵy salasynda zańdylyqtyń saqtalý jaǵdaıy birtindep jaqsaryp keledi. «Bas prokýratýra 2009-2010 jyldary aralyǵynda Aýyl sharýashylyǵy mınıstrliginiń, agrosharýashylyq sektorǵa qatysty jergilikti atqarýshy organdarynyń qyzmetine tekserýler júrgizgen bolatyn. Osyǵan oraı, atalǵan kezeńde 6 myńnan astam zań buzýshylyq anyqtaldy. 9 qylmystyq is qozǵalyp, 40 ákimshilik óndiris ashyldy. 269 prokýrorlyq usynymdar jasaldy. 70 narazylyq bildirildi. Sonymen qosa, tártiptik jaýapkershilikke 78 jaýapty tulǵa tartyldy», - deıdi A. Ogaı. Onyń aıtýynsha, 2009 jyly aýyl sharýashylyǵy salasyn qoldaýǵa qatysty janar-jaǵarmaıdy sýbsıdııalaý barysynda da zań óreskel buzylǵan. Osy maqsattarǵa bólingen qarajattardyń bir bóligi talan-tarajǵa túsken. Atqarylǵan jumystardyń aktileri de jalǵan jolmen jasalǵan.

«Budan bólek, ótken jyldar ishinde egis alqaptaryna egilgen daqyldar túrlerin jalǵan kórsetý de oryn alǵan. Daqyl túrlerine qaraı sýbsıdııalardyń mólsheri de ártúrli bolatyndyqtan, birqatar sharýalar mólsheri joǵary daqyldardy udaıy kórsetip, memleket qarajatyn zańsyz ıelenip otyrǵan», - deıdi prokýratýra ókili. Sonymen qatar, A. Ogaı bıýdjet qarajattarynyń óziniń maqsatyna saı jumsalmaıtynyn da tilge tıek etti. Máselen, jyl saıyn bıýdjet qarajatynyń artyp otyrýyna qaramastan, aýyl sharýashylyǵy salasyndaǵy negizgi daqyldarynyń jalpy túsimi tómen kórsetkishke ıe. «Al statıstıkalyq málimetterge súıensek, egis alqaptary 2009 jyly 30 paıyzǵa deıin artqan. Alaıda, osyndaı olqylyqtardy saralaı kele, biz sýbsıdııalaýdyń qoldanystaǵy tetiginiń tıimdiligi tómen degen sheshimge kelip otyrmyz», - dedi ol.