2008 jyly qylmystyq zańnamalar kúsheıtilgennen beri Qazaqstanda nashaqorlyq jaǵdaı turaqtana bastady - J.Súleımenov
ASTANA. Maýsymnyń 24-i. QazAqparat /Gúlmıra Álıakparova/ - 2008 jyly qylmystyq zańnamalar kúsheıtilgennen beri Qazaqstanda nashaqorlyq jaǵdaı turaqtana bastady.
Bul týraly búgin Astanada «Memlekettik organdar men úkimettiń emes sektorlardyń nashaqorlyqtyń aldyn alý jáne saýyqtyrý máselesindegi sabaqtastyǵy jáne ózara áreket etýi» taqyrybynda ótken dóńgelek ústel barysynda QR ІІM Esirtki bıznesine qarsy kúres komıtetiniń tóraǵasy Janat Súleımenov málim etti.
J.Súleımenovtyń aıtýynsha, eki jyl buryn qazaqstandyq qylmystyq zańnamalar kúsheıtilgennen beri elde nashaqorlyq jaǵdaı turaqtana bastaǵan. Sondaı-aq sońǵy jyldary esepte turǵan nashaqorlyqqa táýeldilerdiń sany da azaıa túsken.
«Qazaqstannyń qylmystyq zańnamasy TMD elderi ishinde eń qatań dep sanalady. Sonyń arqasynda sońǵy jyldary Qazaqstanda Reseı men Ortalyq Azııa elderinde sııaqty nashaqorlyq jaǵdaı jaqsara bastady. Bul jaǵdaıǵa Aýǵanstanda qolǵa alynyp jatqan sharalar da oń áserin tıgizýde. Aýǵanstandaǵy koalıtsııaǵa qarsy kúshter jasap jatqan áreketter men Aýǵanstanǵa jaqyn ornalasqan elderdiń qurǵan esirtkige qarsy beldeýi nátıjesin berýde», - deıdi ol.
