2008-2010 jyldarǵa arnalǵan turǵyn úı-qurylys baǵdarlamasy boıynsha Almatyda 1634 páter paıdalanýǵa berildi - Turǵyn úı departamentiniń bastyǵy
ALMATY. 24 qańtar. QazAqparat /Erlik Erjanuly/ - Almatyda sáýir-mamyr aılarynda qalalyq baǵdarlama boıynsha oblıgatsııalyq zaem esebinen salynatyn páterlerge qujat qabyldaý rásimi bastalady.
Ony Turǵyn úı departamentiniń bastyǵy Qaırat Nurqadilov búgin qalanyń 2010 jylǵy áleýmettik-ekonomıkalyq damýynyń qorytyndysyna arnalǵan májiliste aıtty.
"Qazaqstan Respýblıkasynyń 2008-2010 jyldarǵa arnalǵan turǵyn úı qurylysy" baǵdarlamasy boıynsha 15 305 ótinish qabyldandy. 2009-2010 jyldary bul baǵdarlama boıynsha 1634 páter paıdalanýǵa berildi. Onyń 292-si jas otbasylarǵa, 396-sy memlekettik qyzmetkerlerge, 361-i memlekettik mekemelerdiń qyzmetkerlerine, 585-i memlekettik kásiporyndardyń qyzmetkerlerine berildi", deıdi Turǵyn úı departamentiniń bastyǵy Qaırat Nurqadilov.
Onyń aıtýynsha, bul baǵdarlama aıaqtalǵandyqtan ótinish qabyldaý aıaqtalǵanymen oǵan qyzyǵýshylyq bildirýshiler áli tolastar emes. Endi qalalyq baǵdarlama boıynsha oblıgatsııalyq zaem esebinen 2011-2014 jyldary 2500 páter salynady. Qarajat revolverlik júıe boıynsha jumys isteıdi.
