2006 jylǵy úlgidegi 2, 5, 10 myń teńgelik banknottardy aıyrbastaý 1 aqpanda aıaqtalady
ALMATY. QazAqparat - 2006 jylǵy úlgidegi nomınaly 2, 5, 10 myń teńgelik banknottardy qabyldaý jáne aıyrbastaý 1 aqpanda aıaqtalady. Ulttyq banktiń Qolma-qol aqsha aınalysy departamentiniń dırektory Jomart Qajymuratov osylaı málim etti, dep habarlaıdy QazAqparat.
Ulttyq bank 2006 jylǵy úlgidegi nomınaly 2 000, 5 000, 10 000 teńgelik banknottardy qabyldaý jáne aıyrbastaý merzimi aıaqtalyp qalǵanyn eske salady. Jeke tulǵalar úshin banknottar tek Ulttyq banktiń fılıaldarynda aıyrbastalady.
«21 qańtardaǵy jaǵdaı boıynsha banknottardy aýystyrýǵa eń kóp suranys bildirgender Almatyda (23,6%), Nur-Sultanda (9,2%) Shymkent qalasy men Túrkistan oblysynda (8,5%) tirkeldi. Bul rette aıyrbastaýǵa qabyldanǵan barlyq banknottyń 42,4%-y 10 000 teńgelik nomınalǵa tıesili. Odan keıin nomınaly 2 000 teńgelik (30,6%) jáne 5 000 teńgelik (27,0%) banknottar boldy», - deıdi Jomart Qajymuratov.
Onyń aıtýynsha, banknottardy qabyldaý merzimin uzartý týraly sheshim turǵyndardyń ótinishine baılanysty qabyldandy. Keıbir azamattar, negizinen, zeınet jasyndaǵy adamdar, belgili bir sebepterge baılanysty eski banknottardy ýaqytynda aıyrbastap úlgermegen
«2021 jyldyń 1 aqpanynan bastap Ulttyq banktiń fılıaldary 2006 jylǵy úlgidegi nomınaly 2 000, 5 000, 10 000 teńgelik banknottardy qabyldaýdy jáne aıyrbastaýdy toqtatady. Osyǵan baılanysty, 2021 jyldyń 1 aqpanyna deıin kórsetilgen banknottardy ulttyq valıýtanyń jaramdy aqshalaryna aıyrbastap alý úshin jaqyn jerdegi fılıalǵa habarlasýyn suraımyz», - deıdi Jomart Qajymuratov.
