2026 jyly Ulttyq qordan balalarǵa qarajat berile me
ASTANA. KAZINFORM – Ulttyq bank tóraǵasy Tımýr Súleımenov 2026 jyly Ulttyq qordan balalarǵa tólem jasaýǵa qatysty pikir bildirdi.
Ulttyq bankte ótken brıfıngte BAQ ókilderi keıbir sarapshylardyń bıyl Ulttyq qordyń tabysy joq ekenin alǵa tartyp otyrǵanyn aıtqan edi.
— Muny aıtyp otyrǵan qandaı sarapshy ekenin bilmeımin. Ulttyq bank Ulttyq qorda basqara otyryp, 7 aıdyń qorytyndysynda 4,6 mlrd dollar tabys tapty. Kiristilik dollarǵa shaqqanda 8 paıyz boldy, - dedi ol.
Sonymen qatar onyń aıtýynsha, ınvestıtsııalyq kiris boıynsha da shyǵyn joq.
— Kerisinshe úshinshi jyl qatarynan Ulttyq qordy basqarýdan laıyqty ınvestıtsııalyq tabys alyp otyrmyz. Bul qorǵa aktıvterin ulǵaıtýǵa múmkindik beredi, - dedi UB tóraǵasy.
Osy oraıda Tımýr Súleımenov kelesi jyly balalarǵa Ulttyq qordan qansha qarjy aýdarylatyndyǵy ázirshe belgisiz ekenin aıtty. Barlyǵy da bala týý kórsetkishine, jyl sońynda qansha balanyń 18 jasqa tolatynyna jáne basqa da faktorlarǵa baılanysty. Balalarǵa aýdarylatyn qarajat somasy kelesi jyldyń qańtarynda belgili bolady.
Aıta keteıik, baǵdarlama resmı túrde 2024 jyldyń 1 qańtarynda bastaldy. Onyń aıasynda 2006 jyldan bastap dúnıege kelgen ár balaǵa Ulttyq qordan jyl saıyn qarajat aýdarý kózdelgen.
Qarjy mınıstrliginiń málimetinshe, ótken jyly baǵdarlamaǵa 6 919 131 adam — 2006 jyldan 2023 jylǵa deıin qosa alǵanda týylǵan balalar qatysty. Olardyń árqaısysyna $100,52 esepteldi. Esepteýdiń jalpy somasy $695,5 mln-dy qurady. Ulttyq qordan aqsha eseptelgen balalardyń jalpy sanynan 2024 jyly 304 815 adam 18 jasqa jetti, olarǵa jalpy somasy $30,6 mln aýdaryldy.