2005 jyldan beri álemdik deńgeıdegi terrorızm qateri 10 esege deıin artyp otyr - E. Qarın
ASTANA. QazAqparat - 2005 jyldan beri álem boıynsha terrorızm qateri 10 esege deıin artyp otyr. Búgin QR Prezıdenti janyndaǵy Ortalyq kommýnıkatsııalar qyzmetindegi brıfıng barysynda ekstremızm men lańkestikke qarsy áreket jónindegi zertteýler nátıjesi týraly baıandaǵan saıasattanýshy Erlan Qarın osylaı málim etti.
«Sońǵy 10-12 jylda terrorızmniń qaýip-qaterleri jahandyq deńgeıde ósip kele jatqany baıqalady. Ásirese, 2005 jyldan beri bul qubylystyń artýy 10 esege deıin baryp otyr. Eger 2005 jylǵa deıin jylyna álem boıynsha 200-300 terrorıstik aktiler oryn alǵan bolsa, 2005 jyldan bastap bul kórsetkish kúrt ósip, jylyna 10 myńnan astam oqıǵalar tirkelip jatyr. Bul álem boıynsha oryn alyp otyrǵan qubylys», - deıdi Erlan Qarın.
Onyń aıtýyna qaraǵanda, búgingi terrorızm álemniń barlyq memleketterine qaýip tóndirip otyrǵan faktorlardyń biri. Al 2005 jyldan bastap osyndaı qaterlerdiń ósýine basty sebep - Aýǵanstan, Irak, Taıaý Shyǵystaǵy memleketter sekildi jańa qaýip-qater oshaqtarynyń paıda bolýymen baılanysty.
«Keıbir sarapshylardyń pikirinshe, búgingi ýaqytta terrorızmniń qaýip-qateri jańa formaǵa, jańa formatqa ótip jatyr. Ótken ǵasyrdyń 60-80 jyldaryndaǵy terrorıstik uıymdardyń is áreketi men búgingi lańkestik uıymdardyń is-áreketindegi mazmuny da, sıpaty da, syrtqy formasynda da aıyrmashylyq barshylyq. Osynyń saldarynan terrorızm soǵystyń jańa túrine aınalyp keledi jáne sonyń nátıjesinde álem boıynsha áskerı maqsatqa bólinetin qarajat ta kúrt artyp otyr. Máselen, Stokgolmdegi halyqaralyq uıymnyń zertteý málimetterine qaraǵanda, dúnıejúzinde sońǵy 10 jylda áskerı maqsatqa bólingen qarajat 2 esege artqan. Mamandar bul úrdisti terrorızm qaýpimen tyǵyz baılanystyrady», - dedi ol.
