2000 jyldan beri qaraı kiristeri eń tómengi ómir súrý kórsetkishinen az azamattar sany 4 esege kemidi - Úkimet basshysynyń orynbasary
ASTANA. Maýsymnyń 8-i. QazAqparat /Aıdar Ospanalıev/ - Eldegi kedeıliktiń deńgeıin tómendetý Qazaqstannyń áleýmettik saıasatynyń basym baǵyttarynyń biri.
2000 jyldan beri qaraı elde kedeılikpen jáne jumyssyzdyqpen kúres baǵdarlamasy júzege asyrylyp keledi. Osyǵan qaraı búgin eldegi kiristeri eń tómengi ómir súrý kórsetkishinen az azamattar sany 4 esege kemidi. Bul týraly búgin Astanada «Álemdik daǵdarys jaǵdaıyndaǵy áleýmettik qamsyzdandyrý: zaman talabyna ulttyq kózqaras», atty taqyrypta ótip jatqan halyqaralyq konferentsııa barysynda Premer-Mınıstrdiń orynbasary Erbol Orynbaev málim etti, dep habarlaıdy QazAqparat.
Onyń aıtýynsha, eldegi demogarfııalyq ahýaldy jetildirý jáne balaly otbasylarǵa qoldaý kórsetý maqsatynda 2003 jyldan bastap, balanyń týýyna baılanysty bir mezgildik járdemaqy tólenedi. Al 2006 jyldan bastap, 1 jasqa tolǵanǵa deıingi bala kútimine qajetti qarjy tólenedi. «Áleýmettik salaǵa jumsalatyn qarjy kólemi memlekettik bıýdjettiń jartysyn, al áleýmettik qamtamasyz etýge shyǵyndalatyn qarjy bıýdjettiń 5/1-in quraıdy», dedi Úkimet basshysynyń orynbasary.
Onyń sózine qaraǵanda, 2007 jyly Búkilálemdik bank Qazaqstandy ortasha kiristi memleket retinde baǵalady. Al memlekettiń azamattarynyń ómiriniń sapasyn arttyrý, turǵyndardyń densaýlyqtaryn nyǵaıtý, ana men balaǵa degen qamqorlyq sharalaryn nyǵaıtý eldegi týý kórsetkishteriniń jaqsarýyna yqpal etti. «Búginde respýblıka halqynyń sany 16 mıllıon 300 myńdy quraıdy. Bul osydan 10 jyl burynǵy kórsetkishten 1 mıllıonnan astamǵa kóp. Álemdi daǵdarys jaılaǵan sáttten bastap, Qazaqstanda Memleket basshysynyń tapsyrmasymen eldegi ekonomıkalyq jáne áleýemettik turaqtylyqty qamtamasyz etý maqsatynda jedel sharalar qolǵa alyndy», dedi E.Orynbaev.
