200 jańa óndiris orny ashylyp, 17 myń jumys orny qurylady

ASTANA. KAZINFORM – Elimizde jańa 17 myńnan astam jumys orny ashylatyn 200 joba iske asyrylady. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev aıtty.

ónerkásip, óndiris
Foto: Kazinform

- Memleket basshysy Joldaýynda elimizde otandyq óndiristi damytý, jańa kásiporyndar ashý jáne ónerkásiptiń múmkindigin arttyrý boıynsha naqty mindet qoıdy. Osy oraıda ónerkásip salasyndaǵy turaqty ósimdi saqtap, óndiris kólemin odan ári arttyrý mańyzdy. On aıdyń qorytyndysy boıynsha óndiris kólemi 9,3%-ǵa ósip, oń dınamıka kórsetti. Salaǵa serpin beretin mańyzdy baǵyttardyń biri – jalpy ınvestıtsııa kólemi 1,7 trln teńgeden asatyn 200 jańa jobany iske qosý, - dedi mınıstr.

Ersaıyn Naǵaspaevtyń aıtýynsha, atalǵan jobalardy iske asyrý nátıjesinde 17 myńnan astam jańa jumys orny ashylady. Onyń ishinde 5,5 myń jumys orny aýyldyq jerlerde qurylady. Jobalar tolyq qýatyna shyqqan jaǵdaıda, jyl saıyn shamamen 1,5 trln teńgeniń ónimi óndirilip, 500 mlrd teńgesi eksportqa baǵyttalady. Jyl basynan beri jalpy ınvestıtsııa kólemi 900 mlrd teńge bolatyn 125 joba iske qosyldy. Qalǵan jobalar aıaqtalýǵa jaqyndap, iske qosýǵa daıyndalyp jatyr.

- Aıta ketý kerek, bul jobalar Qazaqstanda buryn óndirilmegen jańa ónim túrlerin ıgerýge múmkindik beredi. Olardyń qatarynda temirjol bandajdary, dońǵalaqtar, presteý jabdyqtary, lamınat, tamshylatyp sýarý júıeleri jáne kofe mashınalaryna arnalǵan alıýmınıı kapsýlalar bar. Memlekettik qoldaý sharalaryn naqty óndiriske baǵyttaýda Qazaqstandyq taýar óndirýshilerdiń tsıfrlyq tizilimi mańyzdy ról atqarady, - dedi ol.

Onyń dereginshe, búginde tizilimde 50 myńnan astam ótinim qaralyp, 2,6 myńǵa jýyq otandyq óndirýshi men olardyń 72 myń taýary tirkeldi. Tizilimniń negizgi satyp alý alańdarymen birigýi nátıjesinde jyl basynan beri 94 myń satyp alýda otandyq ónimge basymdyq berildi. Qosymsha ónimniń naqty elde óndiriletinin rastaý jáne baqylaý tetikteri jetildirilip jatyr.

- Osy maqsatta óndiristi tsıfrlyq tekserý jáne lokalızatsııaǵa qoıylatyn talaptar kúsheıedi. Sondaı-aq kásiporyndardyń qyzmetin taldaý úshin jasandy ıntellekt, óndiris qýat júktemesin baqylaý úshin tsıfrlyq dashbord engizý josparlanǵan, - dedi Ersaıyn Naǵaspaev.

Aıta keteıik, Úkimet otyrysynda otandyq taýar óndirýshilerdi qoldaý máselesi qaralyp jatyr.