200 teńge: Astanadaǵy aqyly turaqtarda saralanǵan tarıf bolýy múmkin
ASTANA. KAZINFORM — «Astana qalasynyń jol qozǵalysyn uıymdastyrý ortalyǵy» JShS dırektory Dáýren Sábıtov qaladaǵy aqyly tarıfter qalaı ózgerýi múmkin ekenin aıtty.
— Qalada 535 turaq aımaǵy men 10 myńnan astam turaq orny bar. Bizdińshe, sol turaqtardan alynatyn tólem somasy tómen. Osyǵan deıin bul jumysty jeke bıznes atqarǵan edi. Qazir osy qyzmet ákimdiktiń qurlymyna kirdi. Endi, 10 myńnan astam oryndy Jol qozǵalysyn uıymdastyrý ortalyǵyna berý boıynsha ákimdikpen birge tıisti jumys iske asyp jatyr. Tıisti sheshim eki kún buryn shyqty, — dedi Dáýren Sábıtov Astana qalasy máslıhatynyń kólik máseleleri jónindegi turaqty komıssııasynyń otyrysynda.
Onyń aıtýynsha, qalada saralanǵan tarıf boıynsha turaq oryndaryn belgileý jospary bar.
— Tamyz aıynyń sońynda nemese qyrkúıektiń basynda saralanǵan tarıfti kirigýimiz kerek. Sebebi, kólik kóp shoǵyrlanǵan ortalyqtaǵy oryndarǵa suranys joǵary. Osy oraıda osy turaqtardaǵy tarıfti ulǵaıtý usynyldy. Qaladaǵy turaqtardy úsh aımaqqa bólip, solar boıynsha ártúrli tarıfti engizý jumysyn bastap kettik, — dedi ortalyq basshysy.
Máslıhattyń kólik jónindegi turaqty komıssııasynyń otyrysynda taratylǵan málimetke qaraǵanda, turaq quny saǵatyna 100, 150 jáne 200 teńge shamasynda belgilenbek. Eń joǵary tarıf elordanyń ortalyq bóliginde bolady.
Eske salsaq, elordadaǵy aqyly turaqtar ákimdiktiń menshigine tolyqqandy ótti.
