200 otbasyn qaýipti aımaqtan kóshirýge arnalǵan turǵyn úıler qurylysynyń qarqyny synaldy

KÓKShETAÝ. QazAqparat – Atbasar qalasynda turǵyndardy sý basý qaýpi bar eldi mekenderden kóshirý úshin salyna bastaǵan qos úıdiń qurylysy belgilengen kesteden keshiktirilip jatyr. Oblys ákimi qurylys basynda bolyp, jumys qarqynyn údetý qajettigin eskertti, dep habarlaıdy QazAqparat tilshisi.

Qalanyń 1-shaǵyn aýdanynda árqaısysy 100 páterlik eki turǵyn úıdiń qurylysy júrip jatyr. Qos úı men olarǵa ınjenerlik jeliler tartýǵa Úkimet rezervinen 4 mlrd. 200 mln. teńge bólingen. Qarjynyń ýaqtyly bólinýine qaramastan, qurylys jumystary belgilengen kesteden keshigip keledi. Óńirdegi sý tasqyny qaýpi bar aýmaqtardy baqylaý sapary barysynda aımaq basshysy Ermek Marjyqpaev qurylys pen turǵyn úı mańyn abattandyrý jumystary qarqynyn údetý qajettigin eskertti.

Sońǵy úsh jylda qalanyń sý basý qaýpine ilikken aımaǵynan 459 otbasy kóshirilgen. Áli 500 otbasy qonys aýdarýy kerek. Aýdan ákimi Amanbek Qaljanov bul otbasylardyń 200-i qyrkúıek aıyna qaraı kóshiriletinin, al qalǵan 300-iniń máselesi áli tolyq sheshilmegenin aıtqan bolatyn .