200 myń qazaqstandyq jumyspen qamtylady - senator A. Bıjanov
Bul týraly búgin Ortalyq kommýnıkatsııalar qyzmetinde ótken brıfıngte QR Parlamenti Senatynyń depýtaty Ahan Bıjanov málim etti.
"Bizdiń memleket jumyssyzdyqty boldyrmaý maqsatynda barlyǵyn istep jatyr. Eń basty qolǵa alǵan sharasy - "Nurly jol" baǵdarlamasy. Osynyń arqasynda biz qazirgi zamanǵy kóliktik-logıstıkalyq ınfraqurylymǵa ıe bolamyz. Jol qurylysy beleń alady. Bul kólik jáne logıstıka máselelerin sheshý ǵana emes, ekonomıkanyń ózge salalaryn: metall óndirisi, tsement, qurylys materıaldary jáne taǵy basqa salalarǵa serpin beredi. Sonymen qatar 200 myńǵa jýyq jańa jumys oryndarynyń ashylýy josparlanýda", - dedi ol.
Depýtattyń aıtýynsha, sonymen qatar "Jumyspen qamtý-2020" baǵdarlamasy júzege asyrylýda. Ol boıynsha, 2010-2014 jyldar aralyǵynda 260 myń jumys orny ashylǵan.
"Jumyssyzdyqty boldyrmaýdyń taǵy bir baǵyty - shaǵyn jáne orta bıznesti qoldaý. Kásipkerlikti damytýǵa bıýdjetten 75 mlrd teńge bólindi. Indýstrııalandyrý baǵdarlamasy aıasyndaǵy jobalar da saqtalady. Bıyl ındýstrııalandyrý aıasynda 75 nysan salynady jáne 7,5-8 myń jumys orny qurylady", - dedi senator.
