200 myńnan astam pedagog jasandy ıntellektini qoldanýǵa arnalǵan tegin kýrstan ótti

ASTANA. KAZINFORM — Qazaqstandyq pedagogterdiń tsıfrlyq saýattylyǵyn arttyrýǵa baǵyttalǵan oqytý baǵdarlamasy jalǵasyp jatyr. Bul týraly Oqý-aǵartý mınıstrligi máldim etti.

— Jańa oqý jylynda 200 myńnan astam muǵalim jasandy ıntellektini bilim berý protsesinde tıimdi paıdalaný boıynsha kýrstan ótip, onyń 140 myńǵa jýyǵy kýálik aldy. Ásirese, Shymkent qalasy, Túrkistan jáne Jambyl oblysynyń pedagogteri belsendilik tanytty. Qatysýshylardyń basym bóligi — bastaýysh páni muǵalimderi, — delingen habarlamada.

QR Oqý-aǵartý mınıstrligine qarasty «Órleý» biliktilikti arttyrý ulttyq ortalyǵy ıÝNESKO-men birlesip, halyqaralyq tájirıbe negizinde ázirlegen baǵdarlamany qazaqstandyq pedagogterge beıimdedi. Kýrs barysynda muǵalimder JI quraldaryn tıimdi ári etıkalyq turǵyda durys qoldanýdy, prompt jazýdy, sabaq josparlaý, testileý men oqý materıaldaryn ázirleýdi meńgeredi.

Baǵdarlamaǵa Qazaqstannyń kez kelgen óńirindegi pedagog reg.orleu.edu.kz saıty arqyly tirkelip, LMS platformasynda ózine yńǵaıly ýaqytta tegin onlaın qatysa alady.

Eske sala keteıik, buǵan deıin Oqý-aǵartý mınıstrliginiń Respýblıkalyq ǵylymı-praktıkalyq bilim mazmunyn saraptaý ortalyǵy oqýlyqtardy saraptaý salasynda jumys isteý úshin pedagog-sarapshylardy irikteýdiń jańa kezeńi bastalǵanyn habarlaǵan edi.