200 myń teńge daýy adam ólimimen aıaqtaldy: Rýdnyıdaǵy oqıǵaǵa qatysty úkim shyqty
ASTANA. KAZINFORM — Qostanaı oblysynyń Rýdnyı qalasynda 19 jastaǵy jigittiń ólimine qatysty sot úkimi shyqty. Aıyptalýshylardyń biri toǵyz jylǵa bas bostandyǵynan aıyrylsa, kámeletke tolmaǵan ekinshisi qylmys týraly habarlamaǵany úshin sottaldy, dep habarlaıdy Kazinform tilshisi.
Qylmystyq isti Qostanaı oblysynyń qylmystyq ister jónindegi mamandandyrylǵan aýdanaralyq soty alqabılerdiń qatysýymen qarady.
Sot anyqtaǵandaı, qaıǵyly oqıǵa 2026 jylǵy 23 qańtarǵa qaraǵan túni Rýdnyı qalasyndaǵy Pavel Korchagın kóshesinde ornalasqan úılerdiń biriniń kireberisinde bolǵan.
Oǵan deıin týyndaǵan janjalǵa jábirlenýshiniń 200 myń teńgeni qaıtarýdy talap etýi sebep bolǵan. Janjal kezinde aıyptalýshy jas jigitke birneshe ret pyshaq suǵyp alǵan. Alǵan jaraqattarynan 19 jastaǵy jigit oqıǵa ornynda kóz jumǵan.
Osy kezde ekinshi, kámeletke tolmaǵan aıyptalýshy bir qabat tómende bolǵan. Ol kisi óltirý qylmysy jasalǵanyn bile tura, quqyq qorǵaý organdaryna habar bermegen.
Oqıǵadan keıin ekeýi de qylmys ornynan ketip, Kókshetaý qalasyna jasyrynǵan.
Bastapqyda A. esimdi aıyptalýshyǵa adamdar tobynyń aldyn ala sóz baılasýy arqyly kisi óltirdi degen aıyp taǵylsa, kámeletke tolmaǵan B. qylmysqa kómektesti dep aıyptalǵan.
Alaıda sot talqylaýy barysynda memlekettik aıyptaýshy olardyń áreketin tıisinshe qasaqana kisi óltirý jáne qylmys týraly habarlamaý baptary boıynsha qaıta saralaýdy surady. Al jábirlenýshi tarap ekeýin de adamdar tobynyń aldyn ala sóz baılasýy arqyly kisi óltirgeni úshin kináli dep tanýdy talap etti.
Daýys berý qorytyndysy boıynsha alqabıler A. esimdi aıyptalýshyny qasaqana kisi óltirgeni úshin, al kámeletke tolmaǵan B.-ny asa aýyr qylmys týraly habarlamaǵany úshin kináli dep tanydy.
Jaza taǵaıyndaý kezinde sot negizgi aıyptalýshynyń kinásin moıyndaǵanyn, sondaı-aq janjalǵa sebep bolǵan jábirlenýshiniń quqyqqa qaıshy áreketin eskerdi. Ekinshi aıyptalýshyǵa qatysty onyń kámeletke tolmaǵany jáne qylmysty alǵash ret jasaǵany jeńildetetin mán-jaı retinde tanyldy.
Nátıjesinde sot mynadaı jaza taǵaıyndady:
-
A. esimdi aıyptalýshy ortasha qaýipsizdik mekemesinde toǵyz jylǵa bas bostandyǵynan aıyryldy.
-
Kámeletke tolmaǵan B. kámeletke tolmaǵandarǵa arnalǵan ortasha qaýipsizdik mekemesinde eki jyl segiz aıǵa sottaldy.
Sonymen qatar kisi óltirgeni úshin sottalǵan adamnan marqumnyń ákesi men aǵasynyń paıdasyna moraldyq zııan ótemaqysy óndirildi.
Sot úkimi zańdy kúshine engen joq.
Buǵan deıin Shymkentte er adamdy urlaý jáne óltirý isi boıynsha alty adam sottalǵanyn jazdyq.
