200 myń bıznes sýbektisi nege jabyldy — Serik Jumanǵarınniń jaýaby
ASTANA. KAZINFORM — QR Premer-mınıstriniń orynbasary — Ulttyq ekonomıka mınıstri Serik Jumanǵarın bul naryqtaǵy ózgerister «qalypty ári tabıǵı qubylys» ekenin málimdedi.
Onyń sózinshe, Úkimet atalǵan sala jóninde tujyrym jasaǵanda, bıznestiń jappaı quldyraýy jónindegi emotsııadan týǵan qaýesetke emes, resmı derekke júginedi.
Serik Jumanǵarın naqty statıstıkany keltirdi. Onyń aıtýynsha, 2026 jyldyń basynda 2,44 mln kásipkerlik sýbektisi tirkelgen. Al sáýir aıynda bul kórsetkish 2,66 mln-ǵa ulǵaıǵan. Bıyl alǵashqy toqsannyń ózinde Qazaqstanda 99 myńǵa jýyq jańa kompanııa men jeke kásipkerler tirkelgen.
Al jabylǵan sýbektilerdiń sany — 208 myń shamasynda. Olardyń basym bóligi onsyz da jumys istemeı, toqtap turǵan.
— Qyzmetin toqtatqan bıznes sýbektileriniń 95 myńdaıy jabylǵanǵa deıin de kásippen aınalyspaǵan, kiris túsirmegen. Keıbir azamattar basqa kompanııalarda basshy retinde jazylǵan. Ózin-ózi jumyspen qamtýshy retinde tirkelgender de kezdesti, — dep túsindirdi vıtse-premer.
Sonymen birge, ol buǵan deıin Úkimet 300 myń bıznes sýbektisi jabylady dep boljaǵanyn atap ótti. Áıtse de, bul sektorda oń dınamıka baıqalyp otyr. QQS tóleıtinder sany 12 myńǵa artqan.
Serik Jumanǵarınniń málimdeýinshe, atalǵan ózgerister iskerlik salanyń nasharlaýyn emes, «naryqtyń tazarýyn» jáne bıznes ortanyń qurylymdyq turǵyda qaıta jasaqtalýyn bildiredi.
Aıta keteıik, buǵan deıin Serik Jumanǵarın Quryltaı saılaýynyń shyǵyndary jóninde pikir bildirgenin jazǵanbyz.
