200 lokomotıv satyp alynady – Kólik mınıstrligi

ASTANA. KAZINFORM – Bıyl 2 350 júk vagon satyp alynyp, qajettilik tolyǵymen jabylady. Bul týraly Kólik mınıstrliginiń Temirjol jáne sý kóligi komıteti tóraǵasynyń orynbasary Nurjan Kelbuǵanov aıtty.

- 2029 jylǵa deıin temirjoldardyń 11 myń shaqyrymynda (70%) kúrdeli jóndeý júrgizý josparlanǵan. Jóndeý jumystarynyń jospary boıynsha 2023-24 jyldary 2 800 shaqyrymy osy jumyspen qamtylǵan. Elimizde 1 800-ge jýyq lokomotıv qoldanysta. Byltyr 185 lokomotıv satyp alynsa, bıyl 200 lokomotıv alynady, - dedi ol Ortalyq kommýnıkatsııalar qyzmetindegi brıfıngte.

Onyń dereginshe, Qazaqstanda 300-ge jýyq vagon operatorlary jumys istep jatyr jáne 140 myń júk vagondary tirkelgen. Byltyr qosymsha 2 350 júk vagondary satyp alynsa, bıyl da sol mólsherde vagon satyp alý josparlanyp otyr. Osydan keıin elimizde júk vagondary tolyǵymen jetkilikti bolady.

- Kórshiles eldermen temirjol túıispelerinde poıyzdardy ótkizý qabiletin arttyrýǵa naqty sharalar júrgizilip jatyr. Mysaly, Reseı elimen 9 temirjol túıispesiniń 5-eýinde, ıaǵnı, Semıglavyı Mar, Orsk, Iletsk, Qartaly, Qurqamys túıispelerinde eki jaqty jumys bastaldy. Osylaısha atalǵan ótkelderdiń ótkizý qýaty 20 paıyzǵa artady. Al Ózbekstanmen shekaradaǵy Saryaǵash túıispesinde jańa joldar salynady. Ol túıispeniń qýattylyǵyn 12 paıyzǵa ulǵaıtady, - dedi Nurjan Kelbuǵanov.

Aıta keteıik, Kólik mınıstrligi temir jol salasynda qolǵa alynatyn jobalardy atady.