200-ge jýyq qazaqstandyq Majarstannyń JOO-da tegin oqıdy
Úkimetaralyq kelisim sheńberinde qazaqstandyqtarǵa jyl saıyn Majarstannyń jetekshi joǵary oqý oryndarynda akademııalyq bilim alýǵa arnalǵan granttar usynylady. Bıyl da «Stipendium Hungaricum» baǵdarlamasy aıasynda Majarstanda bilim alatyn qazaqstandyqtar anyqtalǵan.
««Stipendium Hungaricum» baǵdarlamasy boıynsha Majarstannyń jetekshi joǵary oqý oryndarynda 195 qazaqstandyq bilim alatyn bolady. Olardyń ishinde 102 – bakalavrıat, 72 - magıstratýra, 10 – bakalavrıat pen qosymsha magıstratýra baǵdarlamalary boıynsha, 11 – doktorantýra baǵyty boıynsha oqıdy. Rezervtik tizimge 19 úmitker endi. Grant oqý, jataqhanada turý, medıtsınalyq saqtandyrýdy óteıdi. Sonymen birge aı saıyn stıpendııa tólenedi», - deligen «Halyqaralyq baǵdarlamalar ortalyǵynyń» habarlamasynda.
Ortalyq málimetinshe, bul ýaqytqa deıin sarapshylardan quralǵan táýelsiz komıssııa úmitkerlerdi irikteýdi ótikzgen.
«Qorytyndy sarapshylyq komıssııa kelesi úsh krıterıı boıynsha tizimge qosty: shet tilin bilý deńgeıi, bilim týraly qujattyń ortasha baly jáne áńgimelesý qorytyndysy boıynsha ortasha baǵa. Bıyl úkimetaralyq granttar boıynsha konkýrstyq irikteý erejeleri jetildirildi. Alǵash ret aýyldyq jerlerden úmitkerler úshin artyqshylyqtar berilip otyr. Sonymen qatar bizdiń bastamamyzben úkimetaralyq granttardyń túlekteri úshin eńbekpen óteý merzimi 3 jyldan 1 jylǵa deıin qysqartyldy», - dedi «Halyqaralyq baǵdarlamalar ortalyǵy» AQ Basqarma tóraǵasy Ánýar Janǵozın.
Byltyr úkimetaralyq granttar boıynsha bilim beretin elder qataryna Vetnam, Slovakııa jáne Ázerbaıjan qosyldy. Bul ýaqytqa deıin atalǵan baǵyttaǵy yntymaqtastyqta Belarýs, Majarstan, QHR, Polsha, Qyrǵyzstan, Tájikstan jumys istep kelgen.
