110 mln teńge qaıda túsken: Almatyda zańsyz onlaın-kazıno shemasy áshkerelendi
ASTANA. KAZINFORM — Almatyda zańsyz ınternet-kazınolardyń jumysyn qamtamasyz etken adamdar tobynyń áreketine tosqaýyl qoıyldy, dep habarlaıdy Qarjylyq monıtorıng agenttiginiń baspasóz qyzmeti.
Tergeý dereginshe, kúdiktiler «Olymp Casino», «Rukh Poker» jáne «7Kcasino» ınternet-kazınolarynyń tólem júıesin uıymdastyrǵan. Onyń ishinde «Rocket.do» onlaın-platformasy arqyly oıynshylardan aqsha qabyldaý jáne ony óńdeý jolǵa qoıylǵan.
QMA resmı ókili Ernar Taıjannyń sózinshe, bul iske qatysýshylardyń biri — shetel azamaty. Ol 200 AQSh dollaryna deıin syıaqy alyp, óz bank shottaryn paıdalanýǵa berýge kelisetin adamdardy izdegen.
— Tapqan dropperlerin Qazaqstanǵa ákelip, JSN rásimdetý úshin HQKO-ǵa ertip barǵan. Odan keıin bank bólimshelerine aparyp, shot ashtyrǵan. Sonyń nátıjesinde kúdikti 15 shetel azamatynyń bank shottaryna qol jetkizgen, sondaı-aq óz shotyn da paıdalanýǵa bergen, — dedi vedomstvonyń resmı ókili.
Ol oıynshylardan 16 dropperdiń shotyna túsken qarajattyń jalpy kólemi 110 mln teńgeden asqanyn aıtty.
— Kúdiktilerdiń biri qamaýǵa alyndy, taǵy úsheýine eshqaıda ketpeý jáne tıisti minez-qulyq týraly qolhat túrindegi bultartpaý sharasy qoldanyldy. Qylmystyq is sotqa joldandy. Ózge aqparat QR QPK-niń 201-babyna sáıkes jarııa etilmeıdi, — dedi Ernar Taıjan.
Budan buryn elimizde kazıno ashýǵa ruqsat etiletin aýmaqtar belgili boldy.
