200-den astam jańa óndiris ornynyń qurylysy aıaqtalýǵa jaqyn — Oljas Bektenov

ASTANA. KAZINFORM — Óńdeý ónerkásibiniń qazirgi ósý qarqyny ekonomıkany tolyqqandy ártaraptandyrý úshin jetkiliksiz. Bul týraly Memleket basshysy Qasym-Jomart Toqaevtyń tóraǵalyǵymen ótip jatqan Úkimettiń keńeıtilgen otyrysynda Premer-mınıstr Oljas Bektenov aıtty.

— Óńdeý ónerkásibiniń qazirgi ósý qarqyny ekonomıkany tolyqqandy ártaraptandyrý úshin jetkiliksiz. Buǵan qajetti serpin berý maqsatynda óńdeýshi kásiporyndardyń damýyn yntalandyratyn jobalar júzege asyrylyp jatyr. «Báıterek» holdıngi jelisi boıynsha qarjylandyrý tetikteri arqyly metallýrgııa, mashına jasaý jáne agroónerkásip kesheni salalarynda joǵary deńgeıde óńdelgen ónim shyǵaratyn jobalardy iske asyrý jalǵasýda, — dedi Úkimet basshysy.

Premer-mınıstr salalyq mınıstrlikterge ári qaraı óńdeýge baǵyttalǵan óndiris oryndaryn ashý máselelerin aldyn ala jan-jaqty pysyqtaý mindeti qoıylǵanyn atap ótti. 

— Jalpy alǵanda, ótken jyly 200-den astam jańa óndiris orny iske qosyldy, taǵy osynsha nysannyń qurylysy aıaqtalýǵa jaqyn. Eki jańa avtozaýyt bıyl avtokólik óndirisin jylyna 170 myńnan 360 myńǵa deıin, ıaǵnı eki ese arttyrýǵa múmkindik beredi, — dedi Oljas Bektenov.

Osydan buryn Premer-mınıstr 2025 jyldyń qorytyndysy boıynsha ekonomıkanyń ornyqty ósimin saqtap qalýǵa qol jetkizilgenin aıtty.