200-den astam zapastaǵy almatylyq áskerı bilimin jetildiredi

ALMATY. QazAqparat - Almatyda mamandar ázirleý jáne áskerı bilimdi jetildirý maqsatynda áskerı oqý-jattyǵý jıynyn ótkizý úshin áskerı mindettilerdi, ıaǵnı zapastaǵy ofıtserlerdi, sarbazdardy, serjanttardy irikteý jumystary bastaldy.

QR Qorǵanys mınıstrliginiń baspasóz qyzmetiniń habarlaýynsha, atalǵan jıynǵa Almaty qalasynan 200-den asa adam qatysady. Jıyndyq is-sharalardyń mańyzdy elementteriniń biri - jumystaǵy azamattarǵa turatyn jaǵdaı jasaý jáne jalaqysynyń ornyna ótemaqy tóleý. Jıynǵa shaqyrylǵan barlyq áskerı mindettiler kazarmada turady. Azyq-túlikpen jáne zattyq múlikpen qamtamasyz etý Qorǵanys mınıstrliginiń qarajaty esebinen júrgiziledi.

Budan ózge, jıynǵa shaqyrylǵan áskerı mindettilerge barlyq kezeń úshin jáne olardyń áskerı bólimge deıin jáne keri qaıtatyn jolyn qosa eseptegende jumys orny, atqaratyn laýazymy saqtalady. Sondaı-aq olarǵa respýblıkalyq bıýdjet esebinen ortasha aılyq jalaqy tólenedi.

Jıyn «Ońtústik» óńirlik qolbasshylyǵyna qarasty áskerı bólimderde jáne Qurlyq áskerleri áskerı ınstıtýtynyń bazasynda vzvod komandırlerin, tank ekıpajdaryn, zeńbirekshiler, mergender, saperler, granataatqyshtar, medıtsınalyq saladaǵy arnaıy mamandar jáne basqalaryn ázirleý maqsatynda ótkiziledi.

Atalǵan áskerı jıyn aıaqtalysymen jıynda oqýdy sátti bitirgen  jáne jaqsy minezdemege ıe bolǵan áskerı mindettilerge kezekti áskerı ataqtar beriledi.

Almaty qalasynyń Qorǵanys isteri jónindegi departamenti jáne onyń qurylymdyq bólimsheleri áskerı mindettilerdi osyndaı jıyndarǵa shaqyrýdy júzege asyratynyn aıta ketken jón.