200-den astam týrıst Almatydan Antalııaǵa 7 jarym saǵat keshigip ushty

ALMATY. QazAqparat – Air Astana áýe kompanııasynyń Almaty-Antalııa baǵyty boıynsha reısi búgin saǵat 09:40-ta ushýy tıis bolǵan, alaıda keıinge shegerildi, dep habarlaıdy QazAqparat tilshisi.

Áýe kompanııasy baspasóz qyzmetiniń málimetinshe, reıstiń birneshe saǵatqa keıinge shegerilýi ushaqtyń keshigip kelýinen bolǵan.

«Sebebi, aldyńǵy ushý kezinde ushaqtyń fıýzelıajy (korpýsy) zaqymdalǵany anyqtaldy. Ony joıý boıynsha jumystar júrgizildi», - dep habarlady áýe kompanııadan.

Aıta keteıik, KS 915 reısi Almatydan jergilikti ýaqyt boıynsha saǵat 09:40-ta ushýy kerek bolatyn. Alaıda, birneshe saǵatqa keshigip, 17:15-te ushty. Reıske 209 jolaýshy tirkeldi.

«Olar sýsyndar men ystyq tamaqpen qamtamasyz etildi. Múmkindigi shekteýli jolaýshylar, sondaı-aq qarttar men balaly týrıster ushaqty termınaldyń bıznes-zalynda kútti. Áýe kompanııa keltirilgen qolaısyzdyqtar úshin keshirim suraıdy», - dep atap ótti Air Astana kompanııasynyń baspasóz qyzmeti.