200-den astam sheteldik Qazaqstan arqyly Eýropaǵa zańsyz ótpek bolǵan

ASTANA. QazAqparat – Jyl basynan Qazaqstan arqyly Eýropaǵa zańsyz ótpek bolǵan 210 sheteldik ustaldy. Bul týraly Ulttyq qaýipsizdik komıteti Shekara qyzmetiniń Shekara kúzeti departamenti bastyǵynyń birinshi orynbasary Serik Ahmetqalıev aıtty, dep habarlaıdy QazAqparat tilshisi.

Zańsyz kóshi-qon arnalarynyń negizgi baǵyttary ońtústik kórshilerden bastalyp, Reseı Federatsııasy arqyly jáne odan ári Eýropa odaǵy elderimen jalǵasady. Keıingi kezde ózge elder azamattarynyń shekarany buzý áreketteri jıilep ketti. Olar bizdiń elge tranzıtpen nemese týrıstik vızamen kelip, kórshi Reseıge zańsyz ketýge tyrysady. Tek bıylǵy shilde aıynda Shekara qyzmeti Qazaqstan-Reseı shekarasyn zańsyz kesip ótý múmkindigin izdep júrgen sheteldik 210-nan astam azamatty anyqtady. Olarǵa qatysty Qazaqstan Respýblıkasynyń ákimshilik-quqyqtyq sharalary qoldanylyp, elden shyǵaryldy

, - dedi S. Ahmetqalıev Ortalyq kommýnıkatsııalar qyzmetinde Ulttyq qaýipsizdik komıteti Shekara qyzmetiniń bıylǵy birinshi jartyjyldyqtaǵy qyzmettiniń qorytyndysyna arnalǵan brıfıngide.

Spıkerdiń aıtýynsha, zańsyz mıgranttarǵa syıaqy úshin járdem kórsetetin Qazaqstan azamattary da anyqtalyp jatyr.

Máselen, Batys Qazaqstan, Aqtóbe jáne Qostanaı oblystarynda sheteldikterdi tikeleı shekara syzyǵyna jetkizý faktileri tirkelgen. Osyǵan baılanysty Qazaqstan Respýblıkasynyń Memlekettik shekarasyn zańsyz kesip ótý, onyń rejımin buzý, sondaı-aq buǵan járdemdesý azamattarymyz úshin qylmystyq jáne ákimshilik jaýaptylyqqa ákep soǵatynyn eskertemiz

, - dedi Shekara kúzeti departamenti bastyǵynyń birinshi orynbasary.

Budan buryn habarlanǵandaı, Qazaqstanǵa zańsyz kirýge áreket jasaǵan sheteldikterdiń sany kóbeıgen.