200-den astam kolledj 624 mamandyq boıynsha lıtsenzııasyn qaıtardy

ASTANA. QazAqparat – Elimizde 219 kolledj 624 mamandyq boıynsha 780 biliktilik lıtsenzııasynan aıyryldy, dep habarlaıdy QR Oqý-aǵartý mınıstrliginiń baspasóz qyzmeti.

Bilim berý salasyndaǵy sapany qamtamasyz etý komıtetiniń habarlaýynsha, memlekettik attestattaýǵa daıyndyq kezeńinde 219 kolledj 624 mamandyq boıynsha 780 biliktilik lıtsenzııalaryn qaıtardy. Sondaı-aq Shyǵys Qazaqstan oblysynda jeke kolledj jabyldy.

Aıta keteıik, jyl basynan beri elimizdegi 519 kolledjde memlekettik attestattaý ótti. Taldaý nátıjesi boıynsha Almaty, Astana qalasy, Qostanaı, Mańǵystaý, Atyraý, Shyǵys Qazaqstan jáne Ulytaý, Abaı oblystarynyń tehnıkalyq jáne kásiptik bilim berý uıymdarynda jaqsy kórsetkishter baıqalady.

Degenmen, el boıynsha úsh júzden astam kolledj attestattaýdan ótpedi. Olardyń deni Shymkent qalasy men Pavlodar, Qyzylorda oblystarynda. Batys Qazaqstan, Jambyl, Túrkistan, Aqmola jáne Aqtóbe oblystarynda kórsetkish tómen.

«Baqylaý sharalary bastalmas buryn aqparattyq-túsindirý jumystary júrgizilgen bolatyn. Memlekettik attestattaý tehnıkalyq jáne kásiptik bilim berý salasyndaǵy birqatar problemalardy anyqtap berdi. Qazir Astana qalasy, Almaty, Jetisý, Jambyl jáne Túrkistan oblystaryndaǵy toǵyz jeke kolledjdiń qoldanystaǵy lıtsenzııasy men bilim berý qyzmetin júzege asyrýǵa arnalǵan lıtsenzııaǵa qosymshalardy qaıtarý jumysy júrgizilýde. Bul kolledjder endi bilim berýdi toqtatady. Sondaı-aq lıtsenzııaǵa qosymshasy bolmasa da bilim bergen 10 kolledj anyqtaldy», - deıdi komıtet tóraǵasy Ernur Daýenov.

Taldaý qorytyndysy boıynsha jumys josparlary, oqý josparynyń pánderi men modýlderi boıynsha oqý baǵdarlamalary, óndiristik oqytý men kásiptik tájirıbeden ótý, memlekettik jalpyǵa mindetti standarttyń talaptaryna sáıkes kelmeıtin bazalyq, kásiptik modýlderdi oqytý boıynsha buzýshylyqtar anyqtaldy.

Ýákiletti organdarǵa TjKB uıymdaryna oqý jumys baǵdarlamalary men josparlaryn ázirleýde ádistemelik kómek kórsetýge qatysty usynymdar berildi.