200-den astam qazaqstandyq bankrot ushyraǵan reseılik týragenttiktiń klıenti bolǵan
ALMATY. QazAqparat - 231 qazaqstandyq Reseıde bankrot dep jarııalanǵan «Natalı Týrs» týrıstik agenttiginen joldama alǵan, dep habarlaıdy QazAqparat.
Shilde aıynyń basynda «Natalı Týrs» týrıstik agenttigi 4 shilde men 30 qyrkúıek aralyǵyndaǵy barlyq joldamalardyń kúshin joıǵanyn jarııa etti.
«Eki apta buryn atalǵan týragenttikte máseleler týyndaǵan. Osy aralyqta kompanııanyń birqatar qazaqstandyq klıentteri joldamalarynan bas tartyp, ushaq bıletterin qaıtardy. Osy kompanııa qyzmetine júgingen qazaqstandyqtar sany asa kóp emes, qazir bul 231adam. Óıtkeni qazaqstandyq «Natalı Týrs» quqyqtyq turǵydan bizdiń elimizde tirkelgen, ári ózin bankrot dep jarııalaǵan joq. Sonda da oǵan Reseıdegi bankrottyq yqpal etýde. Bul jaqsy emes. Óıtkeni jaǵdaı áli belgisiz kúıde qalyp otyr», - dedi Qazaqstannyń týrıstik agenttikteriniń prezıdenti Ásel Nurkebaeva.
Onyń aıtýynsha, atalǵan agenttiktiń qazaqstandyq keńsesi bankrottyq jarııalaǵan jaǵdaıda is azamattyq-quqyqtyq alańda sheshimin tabady.
«Qazirgi qazaqstandyq keńseniń dırektory eshteńe jasamaı otyr. Ol tek kassada aqsha joq ekendigin, barlyq qarajatty reseılik kompanııa keńsesine bergenin málim etti. Bizdiń azamattar ushaq bıletterin qaıtaryp, aqshalaryn aldy. Óıtkeni olar charterlik emes turaqty reıske tirkelgen. Sondyqtan aqshany qaıtarýǵa múmkindik týdy», - ddedi Á. Nurkebaeva.
Azamattarǵa keltirilgen jalpy shyǵyn kólemi týrıstik kompanııanyń kommertsııalyq qupııasy bolǵandyqtan jarııa etilmedi.
Avtor: Ásel Asanova
