200-den astam qazaqstandyq pedagog shetelde taǵylymdamadan ótip jatyr

200-den astam qazaqstandyq pedagog «Bilim berý» jáne «Pedagogıka» baǵyttary boıynsha «Bolashaq» baǵdarlamasymen shet elderde taǵylymdamadan ótip jatyr. Bul týraly Oqý-aǵartý mınıstri Ǵanı Beısembaev Shyǵys Qazaqstan oblysy turǵyndarymen kezdesýde aıtty, dep habarlaıdy Kazinform.

«Sapaly bilim berýdiń negizi — muǵalimderdiń áleýetin úzdiksiz arttyrý. Osyǵan oraı pedagogterdi kásibı damytý júıesi túbegeıli ózgerip jatyr. Bıyl 142 myń pedagog biliktilikti arttyrý kýrstarynan ótýde. Negizgi nazar aýyl pedagogterine baǵyttalǵan. Olardyń úlesi 70%-dy quraıdy», — dep atap ótti Ǵanı Beısembaev.

Vedomstvo basshysynyń aıtýynsha, birinshi basshylardyń kásibı áleýetin tıimdi paıdalaný maqsatynda myńǵa jýyq balabaqsha meńgerýshisi, mektep jáne kolledj dırektorlary rotatsııalandy. 

«Prezıdenttik jastar kadrlyq rezerviniń úlgisi boıynsha «Bilim berýdegi ózgeristiń 1 000 kóshbasshysy» iriktelip, pılottyq rejımde daıarlaýdan ótip jatyr. Osylaısha, 2024 jyldan bastap jyl saıyn jańa formattaǵy basshylardyń kadrlyq rezervi tolyqtyrylady. Kolledjderdegi menedjment júıesin jaqsartý úshin osyndaı kadrlyq rezervti jasaqtaý jumystary orta kásiptik-tehnıkalyq bilim berý uıymdarynda da qolǵa alynbaq», — dedi mınıstr. 

Sondaı-aq úzdik bilim berý uıymdarynyń basshylaryn «Bolashaq» baǵdarlamasy boıynsha 3-6 aılyq kýrsqa sheteldik stajırovkaǵa jiberý jumystary jalǵasady.