200-den astam qaraǵandylyq polıtseı marapattaldy

QARAǴANDY. QazAqparat - Qaraǵandylyq polıtseıler qyzmettik mindetterin oryndaý kezinde qaza bolǵan áriptesterin eske aldy. Sondaı-aq shara barysynda oblystyq Polıtsııa departamenttiń 200-den astam qyzmetkeri kásibı merekelerine oraı marapattaldy, dep habarlaıdy QazAqparat tilshisi.

Saltanatty shara aldymen, departamenttiń aýlasynda ornalasqan memorıaldyq taqta janynda bastaldy. Departament basshylyǵy men ardagerler qyzmet barysynda qaza bolǵan qyzmetkerlerdiń qurmetine ornatylǵan eskertkishke gúl shoqtaryn qoıyp, áriptesterin bir mınýt únsizdikpen eske aldy. Olardyń arasynda qaza bolǵandar tártip saqshylarynyń týǵan-týystary da boldy.

Qazaqstan polıtsııasynyń 27 jyldyǵyna oraılastyrylǵan is-shara jıyn zalynda jalǵasty. Oǵan Polıtsııa departamentiniń bastyǵy, polıtsııa polkovnıgi Erlan Faızýllın, UQK Qaraǵandy oblysy boıynsha departamentiniń bastyǵy, general-maıor Kendebaı Adambekov, qaza bolǵan qyzmetkerlerdiń otbasy músheleri, sondaı-aq oblystyq ishki ister organdarynyń jeke quramy qatysty.

«Qazaqstan Respýblıkasynyń Іshki ister organdary 27 jyl ishinde talaı belesterden ótti. Qaraǵandy oblysy ishki ister organdarynyń jeke quramy qashan da eńbekqorlyǵymen jáne kásibı sheberlikteriniń arqasynda aldyńǵy qatardan kórindi. Biz árqashan, qandaı jaǵdaı bolmasyn azamattardyń quqyǵy men bostandyǵyn saqtaýda ózimizge júktelgen mindetterdi buljytpaı oryndap, Elbasynyń sarabdal saıasatyn qoldap, el ıgiligi úshin qyzmet atqaramyz. Sizderdi kásibı mereke - Qazaqstan polıtsııasynyń 27 jyldyq merekesimen quttyqtap, otbasylaryńyzǵa amandyq, eńbekterińizge jemis tileımin», - dedi Erlan Faızýllın.

Merekelik shara barysynda qyzmetimen erekshe kózge túsip, qatarynan oza shapqan 200-den astam polıtseı marapattaldy.

1992 jyldyń 23 maýsymynda Qazaqstan Respýblıkasynyń Prezıdentiniń Jarlyǵymen «Іshki ister organy týraly» QR Zańy qabyldandy. Bul qujat Qazaqstandyq polıtsııa qyzmetkerleriniń quqyqtary men mindetterin aıqyndaıtyn alǵashqy akti bolyp tabylady.