200-den astam eldi mekendi sý basý qaýpi seıildi – QR TJM

ASTANA. QazAqparat – Qazirgi ýaqytta sý tasqyny qaýpi joǵary birneshe óńir bar. Jergilikti ákimdikter 40-tan astam aldyn alý sharasyn ótkizdi.

Bul týraly TJM Tótenshe jaǵdaılardy joıý departamentiniń bastyǵy Qaharman Orazalın málim etti, dep habarlaıdy QazAqparat tilshisi.

«Qazgıdromettiń málimetteri boıynsha elimizde qar basqan aýmaq kólemi 39 paıyzǵa azaıdy. 22-24-shi naýryzda elimizdiń soltústik óńirlerinde qar jáne jaýyn-shashyn tsıklony ótedi. 21 naýryzdan bastap Pavlodar jáne Ulytaý, 22 naýryzdan Qostanaı, SQO, Qaraǵandy, Abaı jáne ShQO-da kúndizgi temperatýra 3-13 gradýsqa deıin joǵarylaýy múmkin», – dedi Qaharman Orazalın Ortalyq kommýnıkatsııalar qyzmeti alańynda ótken baspasóz máslıhatynda.

«Qalǵan qar qory men kúnniń jylynyp kele jatqanyn eskersek, Qaraǵandy, Aqmola, SQO, Qostanaı, Aqtóbe, ShQO jáne Abaı oblysynda sý tasqyny qaýpi joǵary. Ákimdikter jol kartasy sheńberinde 41 is–sharany (11 mlrd teńgeden astam somaǵa) iske asyrdy», - deıdi departament basshysy.

Onyń aıtýynsha, qabyldanǵan sharalar elimizdegi 213 eldi mekendi sý basý qaýpin joıdy. Sonymen qatar 550 myńnan astam adam (551 099) turatyn 580 eldi mekendegi qaterdi azaıtýǵa múmkindik berdi.