200-den astam bir rettik doza: SQO-da esirtki taratqan turǵyn ustaldy

ASTANA. KAZINFORM — Soltústik Qazaqstan oblysynda sıntetıkalyq esirtki zattaryn zańsyz ótkizgen turǵyn ustaldy. Bul týraly ІІM baspasóz qyzmeti jarııalady.

Kúdikti — Aqmola oblysynyń 23 jastaǵy jumyssyz turǵyny.

Tártip saqshylarynyń málimetinshe, ol bir aıǵa jetpeıtin ýaqyt ishinde psıhotroptyq zattardy «jasyryn oryndar» arqyly taratqan.

— Polıtseıler kúdiktini Petropavl qalasyndaǵy Naberejnaıa kóshesinde ustady. Tekserý barysynda onyń kózildirik qorabynan untaq tárizdi zat salynǵan 14 orama, sondaı-aq qaltasynan taǵy 60 orama tárkilendi. Saraptama qorytyndysyna sáıkes, tárkilengen zattyń jalpy salmaǵy 64,1 gramm bolatyn α-PvP sıntetıkalyq esirtkisi ekeni anyqtaldy. Nátıjesinde 200-den 250-ge deıin bir rettik dozanyń zańsyz aınalymǵa túsýine tosqaýyl qoıyldy, — delingen aqparatta.

Medıtsınalyq kýálandyrý nátıjesi kúdiktiniń psıhotroptyq zattardy qoldanǵanyn kórsetti. Qazirgi ýaqytta atalǵan derek boıynsha sotqa deıingi tergeý amaldary júrgizilip jatyr. Qoldanystaǵy zańnamaǵa sáıkes, ol 7 jyldan 12 jylǵa deıin bas bostandyǵynan aıyrylýy múmkin.

Aıta keteıik, Jambyl oblysynda iri esirtki tasymaly arnasy toqtatyldy.