200-den astam aýylda medıtsına mekemesi joq – Ajar Ǵınııat
«Prezıdent óziniń «Ádiletti memleket. Birtutas ult. Berekeli qoǵam» atty Joldaýynda aýyl halqynyń medıtsınalyq kómekke suranysyn qamtamasyz etýge baǵyttalǵan ulttyq jobany iske asyrý qajettigin aıtty. «Aýyldyq densaýlyq saqtaýdy jańǵyrtý» ulttyq jobasyn iske asyrý eki jyl ishinde barlyq aýyldy jáne 650 eldi mekendi medıtsınalyq ınfraqurylymmen qamtamasyz etýge múmkindik beredi. Sondaı-aq 32 kópbeıindi aýdandyq aýrýhana uıymdastyrylady. Osyndaı is-sharalardy júzege asyrý búgingi kúni óte ózekti jáne ýaqyty keldi», - dedi mınıstr Ortalyq kommýnıkatsııalar qyzmetindegi baspasóz máslıhatynda.
Ajar Ǵınııattyń dereginshe, qazirgi tańda aýylda respýblıka halqynyń 41 paıyzy nemese 7 mln 768 myń adam turady.
Olarǵa medıtsınalyq kómek kórsetý úshin 5 myńnan astam medıtsınalyq uıymdar qyzmet etedi.
Onyń ishinde 2 myńnan astam - medıtsınalyq pýnkt, 790 - feldsherlik-akýsherlik pýnkt, bir myńnan astam – dárigerlik ambýlatorııa, 227 – emhana, 203 aýrýhana bar.
Eldi mekenderde 67 myńnan astam medıtsına qyzmetkeri, onyń ishinde 13 myńnan astam dáriger, 54 myń orta medıtsına qyzmetkeri qyzmet atqarady.
«Aýyldyq densaýlyq saqtaý deńgeıinde problemalyq máseleler bar. 200-den astam aýyldyq eldi mekende medıtsınalyq nysan joq. Bul - ózekti másele. Budan basqa, aýyldarda alǵashqy medıtsınalyq-sanıtarlyq kómek uıymdarynyń medıtsınalyq ınfraqurylymynyń 50 paıyzdan astamy tozǵan», - dedi ol.
