200-den astam akýsher-gınekolog dárigerler Almatydaǵy ǵylymı-tájirıbelik konferentsııaǵa qatysyp jatyr
ASTANA. 20 maýsym. QazAqparat - «Salamatty Qazaqstan» memlekettik baǵdarlamasy aıasynda reprodýktıvtik jastaǵy áıelderge kómek kórsetý sapasyn jaqsartý maqsatynda Almaty qalasynda Akýsherııa, gınekologııa jáne perınatologııa ǵylymı ortalyǵynda
«Gınekologııadaǵy jańa tehnologııalar» atty respýblıkalyq ǵylymı tájirıbelik konferentsııa óz jumysyn bastady. Konferentsııany QR Densaýlyq saqtaý mınıstrligi, Akýsherııa, gınekologııa jáne perınatologııa ǵylymı ortalyǵy (AGjPǴO), Qazaqstannyń akýsher-gınekologtar qaýymdastyǵy farmatsevtıkalyq kompanııalardyń qoldaýymen uıymdastyrdy. Bul týraly QR Densaýlyq saqtaý mınıstrliginiń baspasóz qyzmeti habarlady.
Halyqaralyq konferentsııa jumysyna belgili akýsher-gınekolog ǵalymdar, densaýlyq saqtaý uıymdastyrýshylary, shetel jáne Qazaqstan JOO-nyń ǵalymdary, elimizdiń barlyq óńirlerinen, Reseı, Frantsııa, Shveıtsarııadan mamandar, jalpy 200-ge jýyq delegat qatysýda.
Qazaqstan halqynyń densaýlyǵyn qorǵaý, onyń ishinde reprodýktıvtik densaýlyqty qorǵaý memlekettiń mańyzdy maqsaty dep jarııalandy.
AGjPǴO bazasynda 7 jyl kóleminde endoskopııalyq gınekologııa respýblıkalyq ortalyǵy qyzmet etýde, ortalyqta respýblıka dárigerlerine taqyryptyq tsıklder ótkizilip, 100-den astam maman daıyndaldy. Qazaqstanda endoskopııalyq hırýrgııa salasy qalyptasa bastaǵaly qysqa ýaqyttyń ishinde eleýli ózgerister boldy. Tekserýlerdiń ýltradybystyq, aspaptyq jáne endoskopııalyq ádisterin qoldaný túrli jastaǵy áıelderde aýrýdy erte aıqyndaýǵa kómektesedi. Kóp gınekologııalyq operatsııalardy shaǵyn ınvazıvti ádistermen oryndaý áıeldiń bala týý múshesin saqtap qalady. Qazirgi ýaqytta laparoskopııalyq operatsııalyq júıelermen barlyq oblys ortalyqtary jabdyqtalǵan. Odan basqa, kóp medıtsınalyq mekemelerde laparoskopııa jedel járdem rejiminde ótkiziledi.
Jańa tehnologııalardy engizý operatsııadan keıingi naýqastyń aýrýhanada jatyp emdelý merzimin azaıtýǵa, em baǵasyn tómendetýge, bakterııaǵa qarsy jáne aýyrtpaıtyn preparattarǵa ketetin shyǵyndy qysqartýǵa, kosmetıkalyq tıimdilikti jáne naýqastardy tolyq ońaltýǵa múmkindik beredi.
Qazaqstanda alǵash ret AGjPǴO bazasynda biregeı konferentsııa ótkizilip, jıyn kórsetilimi on-laın rejiminde ótedi, ıaǵnı barlyq múddelilik tanytqan mamandar óz oblystarynan shyqpaı konferentsııaǵa qatysa alady. Álemniń jetekshi klınıkalarynyń operatsııa bólmesinen telekópirler júrgiziledi. Belgili shetel ǵalymdarynyń qatysýymen ınteraktıvti oqý sımpozıýmy ótkiziledi.
Konferentsııada ǵylymı jetistikterdiń praktıkalyq tájirıbemen almasý qorytyndysy shyǵarylady, jańa jedel emdeý jáne dıagnostıkalyq tehnologııalar usynylady.
Halyqaralyq konferentsııa jumysy maýsymnyń 24-ne deıin jalǵasady.
