200-den astam adam qazaq tilin Skype arqyly tegin úırenip shyqty
ASTANA. QazAqparat - 2016 jyldyń qyrkúıek aıynda Memlekettik tildi damytý qory Soyle.kz ádistemesi boıynsha qazaq tilin Skype arqyly oqytý jobasyn bastaǵan bolatyn.
Búgingi tańda Skype arqyly Qazaqstan men shet elderden (Reseı, Polsha, Anglııa, Qytaı) 200-den astam adam tegin qazaq tilin meńgerip shyqty, dep habarlaıdy Memlekettik tildi damytý qorynyń baspasóz qyzmeti.
Joba Memlekettik tildi damytý qorynyń áleýmettik seriktesi - «Samruk-Kazyna Trust» qorymen birge uıymdastyryldy.
Jobanyń maqsaty - qazaq tilin úırenýdi kópshilikke qoljetimdi etý, qazaq tilin keńinen nasıhattaý, onyń qoldanys aıasyn keńeıtý, tildiń qoǵamdaǵy mártebesin arttyrý jáne shetelderde turatyn otandastarymyzdyń týǵan eli - Qazaqstanmen baılanysyn nyǵaıtý.
Skype arqyly oqytý tyńdaýshylardy qazaq tilinde emin-erkin sóılesýge, az ýaqyttyń ishinde tildi úırenip, joǵary jetistikterdi kórsetýge múmkindik beredi. Kýrs ár oqýshynyń jeke qazaq tilin bilý deńgeıine jeke tásilderi boıynsha baǵyttalǵan. Skype arqyly qazaq tilin oqytýdyń artyqshylyqtary - ýaqyttyń únemdelýi men yńǵaılylyǵy.
Internet qoldanýshylardyń bildirgen kóptegen pikirleri men tilekterin eskere otyryp, qazaq tilin Skype arqyly oqytý jobasyn osy jyldyń kúzinde jalǵastyrý josparlanyp otyr.
«Soyle.kz» - Qazaqstandaǵy qazaq tilin onlaın rejiminde tegin úıretetin tuńǵysh portal. Búgingi tańda onyń qyzmetin álemniń túkpir-túkpirinen 3 mıllıonnan astam adam paıdalansa, arnaıy tirkelip til úırenip jatqan adamdardyń sany 62 myńnan asty.
